طلعت قبل امس من المسجد عقب صلاة الظهر
ولقيت هاك الشايب يمشي قدامي
> عشان تعرفون أن اخوي يبطي في المسجد ومايطلع الا بعد الشياب
المهم مشى هالشايب وتوجه يم شارعنا
ومشيت وراه لكني وصلته وسلمت عليه
وهديت السرعه ومشيت جنبه انشد عن أحواله وعياله
ويوم وصلت باب البيت قلت : أقلط يابو فلان
قال : ماهي بلحيتك تقلطني في الظهرية ولا حتى عقب صلاة العشاء
قلت : أفا .. أفا .. ليش مهي لحيتي ..
رجال فاتح بيت وعندي زوجه وعيال ومعي جوال ..
قال : هذا بلاء أبوك ياعقاب لو أنت عزوبي وعند أمك كان قلطت
لكنك ماتقدر الحين تقلطني لين تشاور
وماعندي استعداد أوقف عند الباب تحت هالشمس
وترجع لي بعد شوي تدربي رأسك وماتدري وش تعذر به ..!!
قلت : يارجال اقلط ولا عليك ..
أبشرك ماعندي أحد عشان كذا قدرت اعزمك بدون ما أشاور بس لاتعلم أنى
قلطتك ..
قال : دريت إن عندي علم ..
المهم قلط الرجال وصحت باعلى صوت عطونا القهوة والشاهي والقدوع الزين
طبعا الصياح هذا كان على الشغالة ..
>> ترى ماعنده شغالة عشان مايطلع واحد ويقول وش مجلسه معها لحاله ..
رجعت للشايب بالمويه وجلست قدامه وقلت :
اجل انتم يالشياب تعتبرون شباب هالوقت رخوم
قال : لا والله ماهم برخوم ..
والحريم جيدات ومافيهن قصور وتربيتهن تربية صالحة
ومافيهن عيب وكل الحريم ماهن رديات وكلهن يعرفن الصح والخطأ
والاولات مايتزوجن إلا الفارس الشجاع اللي كلن يعرف فعوله
وبنات هالوقت يعرفون إن الزوج الرخمة عذروب ولا ودهن به
وبنت الرجال الطيبين ودها تصير خدامة عند زوجها وهذا طموحها وهذا حالهن
كلهن
لكن المشكلة إن الرجال هو اللي يخرب طبايعها
ويخليها تتغير عن تربيتها في بيت أبوها
والحريم كلهن فيهن حب التملك سواءً الطبية فيهن أو الخايبة
ويحبن يختبرن رياجيلهن من أول يوم باختبارات عاديه
وتشوف عسى رجالها كفو ويفتخر به
لدرجة إن البنت أول ماتتزوج تروح تسأل أخوها وتقول :
وشلون رجالي في المجلس ..؟
عسى كلمته صاملة ورافع رأسه والريجيل يسكتون إذا جاء يتكلم
لكن هالأختبارات تعتبر مواجهة فرديه وتعطي الزوجة انطباع شخصي كامل عن رجالها
وإذا عطاها الرجال وجه زين لها الشيطان اختباراتها
واكثر الريجيل يأخذ في هالأختبارات دويرة حمراء يعني صفر مكعب ..!!
عشان كذا تلقاها مع الوقت وطت على غاربه بدون مايدري
قلت : وشلون تاطا على غاربه ..
أخاف أصير ماطين على غاربي وأنا مادريت ..
علمني تكفى حيالاتهن واختباراتهن ..
قال معاد يمديك راحت عليك كأنك عتقت فأحمد ربك وإن كانك غطست فالله يقدي لك ..
لكن حيالاتهن ان أول ما يتزوجها الرجال
تلبس لها لبس غريب وتشوف هو يهاوشها أو يسكت هالرخمة
لأن بعضهم يقول توها جديده وبعدين اعلمها
ومايدري ان الوقت يروح عليه ويطول سكوته وتعليمه ويصير هو اللي يعَـلـَم مايعلِـم
ويمكن ماتختبره باللبس ولكن ترمي عليه كلمة قشرا من ضمن سالفه وتشوف ردة فعله
وإن كانه ضحك وكركر هالرخمة وفتح فمه
زادت عليه العيار بعد كم يوم وعطته جملة كاملة العن من الكلمة الاولانيه
وإن كانه فتح فمه اكبر من المرة اللي راحت وقال : الله يقطع شيطانك مالتس حق
عرفت إن ماعندك أحد وإن الرجال دجاجة صقعا
وبكذا تبدأ تختبره عند أهلها وتشوف هو يكرشها أو بيبلعها مثل مابلع غيرها
ثم بعد كذا تجربه بهدوء عند أهله
وبكذا تكون وطت على غاربه ومسكته برقبته
وبكذا يصير مثلك معاد يقدر يقلط ولا عاد يقدر يعزم إلا لين يشاورها
أما إن كانه من أول اختبار لها أو أول كلمة قالتها
بيقول : تراب في وجهتس وقطع لسان
فتراها بتقول والله العظيم ماقصدي وليش فهمتني خطأ
ومن ذاك اليوم بتصير تحت رجلينه
ومغير تدور رضاه وقبل لاتقول أي كلمة بتشوف قدام وجهها بيت أهلها
وحروف الطاااااء تطاير قدام عيونها
لذلك تلقاها حريصة في الكلام مع زوجها وبتعرف قيمة الرجال اللي مالي هدومه
وبدال ماتهينه عند أهلها أو أهله تلقاها حاطته أسد وإذا جابوا طاريه
قاموا اللي جنبها يسمعون مصافق رجليها طبعا تصافق من الروعة
وتصير تعرف وجه زوجها وتقاسيمه وتعرف متى تتكلم ومتى تسكت
وبكذا ترتاح الحرمه لأن رجالها أطيب الريجيل وفارض كرامته
وبيرتاح الرجال لأن زوجته تمشي على طاعته ورضاه ..
لذا ننصح الغالبية بالذهاب لسوق الزل في الديرة
لتفصيل سرج الخيول وتركيبه على كتوفهم
لتكون قيادة المرأة مريحة لها وبلا حوادث ..
لأن كلمة : : تراب في وجهتس وقطع لسان ..
صعبه نطقها في هالزمن
وخصوصاً اولئك الذين تم الوطء على غاربهم بالفلوس إذا كانت الزوجه موظفة
لأن يمكن بدال ماتأطأ على غاربه يتم تكسير سنونه ..!!
العرض العادي
