يالله ياوالي عليك التياسيـر=من كنت عونه ما شكى ضيق هوجاس
يالمعتلي بامرك جميع التدابيـر=نعوذ بك يالله من كيد الانجاس
ومن بعد ذكرك هل وبل المعاصيـر=تضفي هماليله على البيد واطعاس
لاشك غيثه من حميم المصاهيـر=ما اظن ينبت به بختري وبسباس
اشوف بعض الناس طب المحافيـر=صحيح يامن قلتوا العرق دسّّاس
لا شك نذكر له بعرض التقاريـر=يبدق لحاله من قبل قطع الانفاس
الاوله نشره وفيها التحاذيـر=الشر مابه خير ولا قيل نوماس
وإن ما تعدّل هل دمعه شخاتيـر=ولا عاد يقرب لا سمع حس الاوناس
حذرا ايتعدى بالامور المقاديـر=ومن ثم يصبح واقعه حيل حسّاس
درب الوعر يوعره سند ومحاديـر=والحر ما ظنيت يحتاج منخاس
لا يمشي برجله دروب المخاطيـر=ما كل دربٍ يسلكه يسلم الراس
ما كل بيض يقال عنهن مغاتيـر=وش جاه ولد الناس بالحيل محتاس
واللي يلوقص للبكار المعاشيـر=جرو العرب حول المواعين لحّاس
ناس تدور الربح نالت مخاسيـر=وناس تلاعب بالذهب عقب الافلاس
ما فات مات ولا تفيد التحاسيـر=مير انصح المخطي قبل دق الاجراس
العرض العادي
