ساحكي لكم قصة واقعيه من وهم الحياة المتقلبه
في يوم من الايام اتجهت الى الســوق ....
دخلت وانا متسكب بلحالي مترزز وش حليلي .... ناوي اخذ غرض واطلع دخلت لمحل عطور....ناوي اشتري عطر....(ومناك ملطف عرق)... المهم لما دخلت قعدت اسولف مع اللي في المحل هو يحاول يقنعني وانا معزّم ياينزل لي في السعر يا ابعطيه ركبه على خشته الين ما ينزل في السعر
هالسمرمدي
ومع محاولة الشد والجذب بيني وبينه....شوي الا اربع بنات دخلو علينا في المحل....كل وحده تقول نعنبوك يالقمر انزل وابنصير محلك طبعا انا ماشفت الا هالعبايات الجديده....وهالريحه اللي تطلع البنكرياس وتقوله شم عساك الماحي ....وهالعيون اللي تقول فناجيل دله مبهره بهيل مخلوط مع قهوة هرري .....
يالله وش ذا الزين...... سبحان اللي خلقكم وسماكم بني ادم وسمى هاللوح اللي قدامي راعي المحل بني ادم سبحان اللي جمعهم بصفة الانسانيه...
طبعا انا طبقت اول نظره لك والثانيه للشيطان وخليتها قزه وحده يعني تكحيله كامله ....
وبعد ماناظرتهم صديت عنهم.....طبعا انا ثقيل(( يمكن ثقيل وزن اما عقل الله يخلف على هلك ))...... ولا عاد يهموني......قمت وبعدت في طرف المحل....شوي الا كل مالهم يقربون وانا ابعد الين ما حشروني في زاويه تقول بس (( يمكن مستغربين من الشكل يحسبونك من الفضاء )).. قامت الطويله وقالت لي وش هالثقل ...طبعا هم 2 طوال ووحده متوسطة الطول ووحده دبدوبه ...ما رديت عليها.....شوي الا الا الدبدوبه تقول تكفى بس نظره....وانا ولا كّن قدامك احد...طبعا شاب طموح (( وش دخل ام الطموح بهالسالفه))
بعدها سويت نفسي ما اسمع....لان مافيه في المحل الا انا و راعي المحل ...شوي الا اللي ماهي طويله تقول لي ممكن لو سمحت !!!
واطالع الا معاها ورقه....قلت وش ذا....قالت رقمي
قلت لها آسف...
.شوي الا الطويله الثانيه قالت ممكن استخدم جوالك
قلت يالله اجر نعطيها الجوال يمكن تكلم أخوها والا أبوها يجي ياخذهم من السوق
وأخذته دقيقه ورجعته لي الا لاقيتها مخّزنه رقمها
قلت لها محاوله حلوه بصراحه
وحذفت رقمها
مانفعت محاولتهم مع واحد ثقيل زيي ....
حاولوا وحاولوا....ولا فيه فائده
انا ما كنت افكر فيهم انا كنت افكر وشلون اكسّر خشت راعي المحل واخليه ينزل في سعر العطر
مسوي ثقل وانا حتى حق العطر ما عندي
المهم ما اتفقنا انا و اللي في المحل ، لما جيت ابطلع قاموا البنات وتقاطوا
علشان يشترون لي العطر اللي كنت ابغاه (( اكيد لأن ريحتي خيستهــم ))
قلت لهم لو سمحتوا خليكم في حالكم ....انا ما طلبت صدقه منكم...(( شديد والهواء ضده في الشوط الاول بس يمكن ينقلب الحال في الشوط الثاني )) .. طلعت من المحل وقلت اللي اولها كذا ينعاف تاليها....خلاص ابطلع من السوق احسن
رحت لسيارتي.....ولما وصلت للسياره لقيتهم يمشون وراي
اعجبني فيهم روح الاصرار والكفاح على الوصول للهدف المنشود...
المهم تذكرت اني ناسي المفاتيح عند راعي المحل....رجعت الا الدبدوبه كانت من ناحيتي وقالت علي الطلاق بالثلاث الا تأخذ رقمي لاتكسحني قدامهم.....
قلت والله اسف....لو سمحتي وخّري عني ..... رجعت للمحل ..... وخذيت مفاتيحي ..
لما رجعت لسيارتي لقيت البنات يبكون على الكبوت ... والدموع اربع اربع....
حسيت بذيك اللحظه اني انسان قاسي القلب ... قمت وقرّبت من البنات وفتحت الكبوت .....
وخليتهم يصبون دموعهم في الرديتر ... لان ما فيه مويا ... وانتم تعرفون هالايام حر لازم ماء الرديتر يكون فل ..
وخرتهم عن الكبوت وشغلت السياره ..... ومشيت وانا اشعر بالنصر ... ومشيت شوي الين ما وصلت المحطه علشان اعبي بنزين ... شوي الا لقيت الدبدوبه متعلقه فوق التنده وهي تقول : اما كذا ولا بلاش ......
المهم نزلتها وقلت لها والله لو تحبين السما ماراح آخذ رقمك .... قالت واللي يرحم والديك .... خذه حتى لو ماتكلمني اهم شي اقهر خوياتي ...... قلت شوفي ....على بلاطه انا ما احب البنات
شوي الا خوياتها الثلاث وصلو مكان الحدث ..... وقاموا يترجوني اني اعطيهم وجه لو دقايق ....... وانا مصر على موقفي .....ووسط دموعهم الحارقه .... وندمي على كسر خواطر هالبنات الضعوف .....
قررت اني اعطف واتكرم عليهم واعطيهم وجه ..... وتوني باكلمهم الا احس ان شي طاح على راسي من السمـــا ..
وشهو ياتــرى ؟؟؟؟؟؟؟؟.....
الا والوالده حفظها الله طاقتني بعصا المكنسه وتقول ... يالله قـــم الحق على محل الفاكهه قبل لايسكّر قم وخل النوم عنك
وقمت ولبست ثوبي من دون ما اغسل وجهي .......
( قصه واقعيه من بنات أفكاري )
**********************
من....بريدى
العرض العادي
