غنّيت مـن حـدب المعاطيـب مـوال
وانـا صغيّـر رحـت يـم البقـالـه
ابشتري مثلـي مثـل كـل الاطفـال
كاشـخ لأنـي خابـراً لـي غـزالـه
بطاقيّتـي واللـي معـي كلـه ريـال
اليـا اقبلـت يمّـي مشيـت ابعدالـه
ومسوّي(ن) حالي ابو كل الابطـال !
غرّ(ن) مع الترتيـب مشغـول بالـه
والزين كله ماخذه عـرض واطـوال
مثل البدر نصـف الشهـر باكتمالـه
فرس اصيل معـذب(ن) كـل خيّـال !
اي والله انـه قـد ذبحنـي دلالــه
امشي واقول ان الهـوى حيـل قتّـال
كنـت آتحـرى جيّـتـه واتصـالـه
قبل الدراسه .. والبياجـر .. وجـوال
حبّـه تمكـن بـي لـحـد الثمـالـه
ياليتني فـي جيـده اليـوم سلسـال
الشكـوى لله كـل مـاجـا مجـالـه
ارقب على المرقاب وابكي على الجال
مـن عقبهـا والحـال لاشـك حالـه
قلبي يضخ الدم شـوق(ن) وغربـال
عشق(ن) قديم(ن) ماخذينـه وكالـه !
واليـوم يلعـب بـه ثمانيـن دلاّل !
ماعـاد ابـي احـد(ن) يعـوّد بدالـه
نفسي عليها من الغرابيـل طربـال !
يامـن يـوّدي للحبـيّـب رسـالـه
قريـب منـي لكـن الوقـت مـيّـال
والله لولا العيـب واخشـى الجهالـه
لاصيح صيحة واحد(ن) صابه هبال !
واطلب من العربـان طـيّ الكفالـه !
وادج دجـة مستجـن(ن) وعيّـال !
وش عاد لو غنّت .. احبك .. اصاله !
قدّ الحروف وقـدّ تحطيـم الآمـال !
راحت هنوفي ومـات راع البقالـه !
وغنيّت بالذكرى على صوت الاطفال !
العرض العادي
