أسعد الله حياتكم
أسعد الله مساكم
أسعد الله مين إمه،، داعيتله برضاكم.
أيها الإخوة المواطنون الأعضاء،،، إننا نمر بأصعب مراحل المراهقة،،، ولابد أن ننتصر.
قدر الله على،، وانا بكامل قواي العقلية،، أن أصبح عضواً في منتدى الود،، غفرانك يا رب.
وكنت قبل ما أدخل المنتدى،، أزبط الشيشة،، وأحكر البراد بالنعناع المديني المفتخر،،، (مو زي اللي يبعوه عندكم بالوانيتات على الشوارع ترى يضحكوا عليكم،،، اللي يبغى،،، يقوللي،، وأنا ارسله)،،، وبعدين أتمغط تمغيطة المقبل على المعركة بصدر رحب،، وأقفل جوالي،،وأقرأ المعوذات وآية الكرسي وسورة يس،،، وأدخل.
ومن كثر ما أقرأالقصص البوليسية،،، تعلمت دقة الملاحظة،، وتحليل الأشياء،،، وأول ما صادفني في المنتدى أسماء الأعضاء.
كل واحد إختار إسم،، أكيد ما إختاره إلا لإنه يعكس شيئ من شخصيته.
أنا من صغري يقولولي ( العمدة ) وما يحتاج لها ذكاء عشان تعرفوا إنه إسم الدلع لـ ( عماد ).
لما دخلت المنتدى،، وجيت أسجل ،، لقيت واحد سابقني ولاطش الإسم.
طبعاً حقدت،، لأن روح التحدي والإقدام عندي،، تخليني أقول،، مو كل واحد يستاهل لقب ( العمدة )،، ( يا سيدي على الثقة).
رحت مسجل بالإسم اللي تعرفوه ( العمدة الإجباري)،، يعني أتخن شنب فيكم ينزل يبارزني،، وأنا أوريه.
وبديت أشارك.
وصرت أرد على مواضيع معينة فقط،،، وعلى أشخاص محددين فقط،، وما كان يفرق معاي إن كان العضو ولد وللا بنت ،،، عشان جاني إحساس من أساميهم،، إنهم راح يتقبلوا ردودي بشكل جيد،،،
أغلب توقعاتي كانت صائبة والحمد لله ،،، واللي كنت أتجنبهم ،، مع الأيام عرفت إن رايئ فيهم مزبوط.
واللي كنت أتوقع فيهم إننا نكون أصحاب،،، صاروا من أعز الأصحاب،،، والحمد لله هم أغلبية.
اليوم جاء على بالي أحلل أسماء الأعضاء الأكثر مشاركة ،، وعلى نفس المبدأ اللي ذكرته،،، يمكن أكون غلطان في تحليلي،،، لكن الغرض منها شوية فرفشة على شوية ضحك على شوية جد.
قسمت الأعضاء حسب مجموعات،، تربط بينهم المعاني الأساسية لأسمائهم:
المجموعة الأولى: شلة الأنس:
هذولا يقولوا لك تعال الله يحييك،،، قرب ولا تخاف،، تبغى تلعب ،، تبغى تعلق،، تبغى تحش،،، ما عندك أحد،،، وناسة مستمرة ،، وبدون زعل,
ناس زي العسل،،، قلوبهم بيضا،، ما تعرف الحقد،،، وساعات يصيروا حساسين،، حسب ظروفهم في البيت والعمل.
ساعات يطلع معاهم كلام كبير وكله حكم وفلسفة،،، تخليك تقول،، من وين جايبه،،، انا بقول ساعات،، يعني مو دايماً
من رواد هذه المجموعة: (فجل - بطة- موون أم قروون- قطوو نايم- فراولة- كراعين نملة- هوازن- هيماء).
المجموعة الثانية: شلة عبقرينو:
هذولا ينطبق عليهم المثل القائل ( وَطْوِطْ ولا تقرب) (هاذي ترجمة للمثل المديني نسنس ولا تقرب)،،
يعني حبايب ودمهم زي العسل،،، وداخلين المنتدى عشان يطلعوا اللي في جعبتهم من الإبداع والمواضيع الجميلة،، ما يهمهم مين يرد،، أو عساه ما احد رد،،، المهم يشتغلوا وينزلوا مواضيع جميلة،،، يمتازوا بالثقة العالية في أنفسهم،، والبعض يحسبهم مغرورين،،، لكنهم بعيدين عن الغرور تماماً.
صريحين لأبعد الحدود،، ما يعرفوا اللف والدوران،، ويمكن صراحتهم موديتهم في ستين دهية،، يستحملوا المزح،،، حتى لو كان ثقيل،،، بس اهم حاجة،،، لا تدوس على مشاعرهم،، ساعتها الله يعينك على ما يجيك.
لكنهم يظلون القلب النابض للمنتدى.
من رواد هذه المجموعة: ( بدون زعل- أنا مرزوقة- الفارس - بكيفي- الكنج- بعبع- زيزو - القط المستهتر- مطلع الشمس- المشهور).
المجموعة الثالثة: شلة الضياع:
يأخي هذولا منت عارفلهم،،، أساميهم تحير،،، ما تدري تقرب لهم ولا تبعد عنهم.
نواياهم مجهولة،، إلى ان تقرب منهم.
ساعات يضحكوا،،، وساعات يبكوا،، وساعات يتفلسفوا،،، وساعات ما تدري وين الله حاطهم.
ما تدري هم عباقرة وللا متخلفين عقلياً،،، مواضيعهم تلخبطك،،، مرة فوق ومرة تحت.
التفسير الوحيد لهذه الشلة،،، إنهم أحسن ناس ينسوا يحطوا كلمة ( منقول ) في مواضيعهم.
من رواد هذه المجموعة: ( بوسة- طفشان العبيط- المعصقلة- الضايعة- برشومي- المجنونة- حياتي نجد).
المجموعة الرابعة: شلة الحبِّيبة:
هذولا وخر عنهم،،،
متجمعين في الصحراء مع القمرة حوالين شبة نار ودلة قهوة وعازف ربابة وجمبه عازف كمان،،،
وخذلك على قصايد حب وغرام وعذاب ودموع وفراق وآآآآآآآآآآآآه يا قلبي.
ما نشوفهم إلا في المناسبات،،، وإذا تبغاهم إطمر على (همس القوافي) تلاقي خيامهم هناك جنب وانيتاتهم.
ودك اول ما تشوفهم تأخذهم بحضنك و أديها بكااااااا.
من رواد هذه المجموعة: ( الرحال- محمد الشمري- معاند الجرح- أسير الشوق- همس الجروح- أمير الحب- نايف معلا- مداوي الجروح- المرهف- بندر السميري- المشتاق- معانق جروح).
المجموعة الخامسة: شلة الغنادير:
يا قلبي على الشلة هادي،،، روح روحي الشلة هاذي ،،،يموتوا في الدلع،، وطايرين فوق الريح.
طبعا يا عمي يحقلهم،،، امامير وصغننين ،،، يا ربي تسعدهم.
نفسك اول ما تشوف واحد منهم تلعبله بخدوده وتديله بوسة من قلبك،، وتشيله هيلا هبا وتلاعبه.
خفيفين شمايل،،، يدخلوا زي النسمة ويطلعوا زي النسمة.
لكن اللي قالقني إني شاكك فيهم،،، يمكن يكونوا جواسيس،،، يعني عيال داخلين بأسماء بنات والعكس.
الله اعلم،،، مجرد إحساس.
من رواد هذه المجموعة: (ريانة العود- دلوعة جدة- ميشو قمر 14- بطة- الحلوة أنا- ندا- آخر العنقود- ريم المدينة)
المجموعة السادسة: شلة الغموض:
تخيل واحد داق اللثمة ولابس نظارة شمسية وماسك جريدة مخرومة وداخل عليك.
ولا سلام ولا كلام،،، يجلس في آخر كرسي في المنتدى ،،، وتحس إن عيونه لازقة في قفاك،، وكل ما تلتفتله،، غطى وجه بالجريدة.
وفجأة تلاقي رد نزل،،، من فين طلع ؟؟ ،، منت عارف،،، وتلاقي أساميهم رموز،،، تقول شغالين في المخابرات؟؟؟
وبعضهم ما تحس فيهم،،، يخش على أطراف أصابعه،،، ينزل رد،،، ويديك على قفاك ويختفي،،، على قولة المثل المديني ( اللي يعرف أبويه،،، يروح يشتكيله).
من رواد هذه المجموعة: ( awwa2002- الرجل الآخر- مطلع الشمس- أم محمد- مملكة الأحزان- الطبع الغريب- أمير الظلام- متامل- صادق الود- EMINEM- محمد2003- الرصاصي- الملكة العقربة).
المجموعة السابعة: شلة: كل مين إيده إله:
مالها علاقة بالأسامي:
شلة مشكلجية،،، كل يوم والثاني تسمع إنهم تضاربوا وتهاوشوا.
يا إنهم حساسين مرة؟؟،،، أو عصبيين مرة،، على قولة المثل المديني برضه ( يسكروا من زبيبة).
فلان ضربني،، علان شتمني،، أجلس يا ولد،،، سيبي شعر أختك يا بنت.
هم حبايب ودمهم زي العسل لما يكونوا رايقين،،، يحبوا يمزحوا ،، وما يحبوا أحد يمزح معاهم.
مواضيعهم حلوة ومتميزة،،، وردوهم آخر منجهة،،، بس دمهم حار.
مخلصين و قلبهم طيب،،، وما نقدر نستغنى عنهم،،، ومن حبهم للمنتدى ،، ما يهون عليهم يسبوه.
من رواد هذه المجموعة: ( بقايا جروح- جورية الود- نوف-سارا- smart girl).
المجموعة الثامنة: شلة الأحلام:
ترى مالها علاقة بفريق الأحلام
أساس هذي الشلة،، الرومانسية،،، ولكن الوجه الآخر لهم،، كله شقاوة ولعب ووناسة.
من أساميهم تلاحظ البعد الرومانسي في حياتهم،،، وعلى طول تنقز لهمس القوافي أو عذب الكلام،، تدورهم،،، وتتفاجأ وما تلاقيهم.
،،، لكن على العكس،،، تلاقيهم مبشكين في موضوع ( يالله إلعبو) وللا ( لعبة التوقعات) في منتدى الفرفشة.
يموتوا في الكشخة،،، وزوقهم لا يعلى عليه،،، وتلاقيهم ينقوا أصحابهم في المنتدى بمعايير شديدة.
أحلى ما فيهم،،، عيونهم ورسمة حواجبهم،،، لا تسألوني كيف عرفت،،، هذي توقعات عمدوية.
من رواد هذه المجموعة: ( صدى الأهات- وجدان الدوحة- الفجر البعيد- عاشق الذكريات- نوارة- مناير- بنت الإمارات- أنا كل المشاعر- حلم - الأمير الصغير- مرووج)
المجموعةالتاسعة: الزعيم
مالها علاقة بنادي الهلال،،، عشان أنا إتحادي.
الزعيم هذا مجموعة لحاله،، وأقصد فيها ( مازن ) صاحب المنتدى.
الرجال هذا غريب،،، زي اللي يفتح مطعم ويروح يأكل في مطعم ثاني،،
إو فاتح سبيل موية لله.
عمري ما شفتله مشاركات عادية،، ردود على مواضيع أو مشاركة في لعبة وخلافه.
ما يرد إلا على شي يتعلق بالإدارة أو التسجيل أو مشكلة معينة تواجهه عضو معين.
أشتهيت مرة ألاقيه يلعب مع (فجل) لعبة ( نص كلمة)،، وللا يرد على (الفارس) ويدافع عني لما كتب قصة حياتي.
بس بصراحة،، أنا بديت أشك فيه،،، يمكن يكون مسجل بإسم ثاني وقاعد يلعب معانا؟؟ يمكن.
عيبه،، ( دخلنا في الجد)،، إنه ما يعرف يدافع عن نفسه،،،
،،، يعني لما تحصل مشكلة تلاقيه ينزل جزء من الحقيقة،،، عشان يتدارك المشكلة،، وبالتالي ناخذ عنه فكرة إنه غلطان،، وخصوصاً إنه يسمع من طرف واحد بس.
لكن العالمين ببواطن الأمور،،، يعرفوا إن الرجال هذا سوى كل اللي يقدر عليه،، وإنه كان محترم لآخر دقيقة.
بس عيبه،،، إنه صعب إقناعه،،، يسوي اللي في راسه وبس،،، ومع إنه يقول إنه يحب النقاش،،، لكنه عصبي وصعب أي واحد يتحمله،،، وبالتالي الواحد يفضل إنه ينسحب من قدامه،،، عشان لا تجيله كلمه طايره من هنا ولاًّ هنا
المجموعة العاشرة: شلة العاهات:
هذي الشلة،، أسميها الشلة المؤقتة،،، يعني ،، يجي يدخل،، ويسجل بإسم غريب يدل على فيوز ضارب في مخه،،، ويبدأ ينقز في المنتدى.
وأساساً،،، هو ما عنده نيَّة يطول،، يقعد له يومين،، عجبه الوضع أو أحد أعطاله وجه،،، كمَّلها شهر،،،
،،، ما عجبه الوضع،،، مسك الباب،، وطلع سكيتي زي ما دخل.
وبعضهم قبل ما يطلع،،، يكتب موضوع وداع ،، يلعن فيه اليوم اللي دخل فيه،، ويتفل على وجهنا ويخرج.
هذولا عيبهم شي واحد،،، يحبوا ياخذوا ،، وما يعطوا،،، يعني لازم أول ما تشوفه تجري عليه وترد وتلعب معاه.
وإذا ما قربت منه زعل ومشي،،، زي أمريكا،،، إذا لم تكن معي،، فأنت ضدي.
قعدت أقلب في أسماء الأعضاء،،، وخرجت بهذه الأسماء،،، ولاحظوا إن معظمهم تركوا المنتدى.
خلينا نقسمهم لمجموعات،،، و نستعرض أسمائهم ونعلق عليها:
1- شلة البقالة:
مفك تونة: --- لا تعليق.
عصير برتقال: --- قرب رمضان وكثرت الإعلانات.
دهن العود: --- يا زينك متروش.
الزول وليد: --- تمشي طوااااااالي على برا.
ولد محلى بالعسل: --- سده وإستريح.
بوكيمون: --- قديم إنت يا أبو الشباب،، خلصنا الجزء الثاني من أبطال الديجيتال.
2- شلة القناة الرابعة:
لمني بشوق: --- يبغالك مكنسة كهربائية.
أحتاج إليك: --- سلف ما عندي،، ولا وظايف،،، حتى لو كنت ماجدة الرومي بشحمها ولحمها.
حكايتي مع الزمان: --- أمسك سرى في الحقوق.
المسافر راح: --- وإنا مالي.
3- شلة الطوارئ E.R.:
المكسور خاطره: --- شاكوش يا جابر.
أبو جرحين: --- ناقصينك.
المخلص في حبه: --- على وزن المنتصر بالله.
مجنون عاقل: --- قدامك حل من إتنين،، يا تنحرف،، يا تنتحر.
العيوزة الشابة: --- تصريح دفن بسرعة.
الفاتنة عمشة: --- يا ماما سوق الحريم جنبنا،، هنا الإسعاف.
4- شلة أولى رابع:
مطنوخ: --- لا تعليق.
مهاوش: --- إطلعلي برا.
مرحبنبك: --- الشيشة يا أم أيمن.
مخرب: --- حسبي الله ونعم الوكيل.
إعفيني: --- مخصوم منك أعمال السنة.
قاهرتهم: --- إنتي داخلة مدرسة وللا حفلة سواريه.
أتحداهم أنا: --- وانا مالي.
أحب الكلام الزين: --- سيِّب كتف زميلتك يا ولد.
العيال كبرت: --- شفت بعيني محد قاللي.
ممكن أكون عاقل؟ : --- هذا إسم ولا جملة فعلية؟؟
مجرمة لكن بضمير: --- يقربلك روبن هود؟؟
الساحق الماحق: --- أحلى يا غراندايزر.
أخيراً أشكركم على صبركم علي بقراءة الموضوع،،، وأتمنى أن أوفق برسم إبتسامة جميلة على شفاهكم،، ولا تزعلوا مني،، ترى الموضوع دعابة،، لا تخلوا من الواقع،،، وحتى الآن لا زلت مدري وين احط نفسي بين هذولا،،، أترك الحكم لكم،،، واللي يزعل مني،،، يروح يشتكيني لأبويا.
ودمتم.
------------------------------------------------------------------------------------------------------------------------
تابعوا معنا مغامرات رجل المستحيل
الجزء الأول ( المعركة الشرسة)إضغط هنا
الجزء الثاني (عملية إنقاذ الطفشان في جزيرة النسوان)إضغط هنا
العرض العادي
