أمريكية
بينما كنت أسير في سيارتي ورابطا حزام الأمان ومتقيداَ بأنظمة المرور ,, فجأة ومن دون سابق إنذار بدأ هاتفي النقال يرن ويرن .. أخرجته من جيبي فأجبته : نعم .. أهلا وسهلا
ملاحظة " ليش أنا مكلف نفسي واكتب باللغة الفصحى .. خلاص بكمل القصة بالعامية "
مره من المرات وأنا بالسيارة كنت في حي الروضه عند بيتنا " طبعا في الرياض " وقفت عند أحد الإشارات ودق جوالي .. وطلعته ورديت .. : نعم , وعليكم السلام , لاما عندي شغل ,
ابشر الحين جايك . " هذا واحد له مكتب تعقيب في حي الملز لايفوتكم "
المهم اتجهت لزميلي اللي في الملز .. نسيت لأقولكم القصة هذي والله حقيقية واللي مو مصدق يسأل حي الملز . المهم يوم وصلت العمارة اللي فيها المكتب وضغطت زر الاصنصير وكان فيه وحده واقفه بجنب الاصنصير " والمشكلة أنها تناظر فيني " استغربت وش هذي وأيش جابها في عمارة كلها مكاتب خاصة بالرجال . جاء الاصنصير , وطلعت فوق وبعدين نزلت بسرعة عشان أشوف موضوع هالبنت "واللي مو مصدق يسأل العمارة أوصح العمارة ما تتكلم طيب أسالوالاصنصير يمكن يرد عليكم
وبعد ما نزلت من الاصنصير ما لقيتها طلعت برا العمارة فحصلتها بالجهة اليسرى واتجهت لها والله يا ناس ما بنيتي شي عليها . لا يروح فكركم بعيد . وقفت عندها يعني على بعد خمس خطوات تقريبا وناظرت فيها وناظرت فيني, وبصراحة عيونها تقول أنها مهمومة لكن جسمها "جسم أمريكيةمن جد " وباين عليها ناعمة مرررره , ناديتها ومباشرة صدّت عني وراحت ( بَرَد وجهي ) فيه شخص بعيد شاف موقفنا كله اتجه لنا وجاء عندها , مباشرة أبعدت عنهم وركبت سيارتي وظليت فيها أراقبهم . وأشوف الرجال يتكلم معاها شوي ويطالع لي شوي , بعد دقيقة تقريبا اشر لي الشخص وناداني بيده نزلت من السيارة ولما وصلته سلمت عليه وقلت له هذي تبعك قال لا.إذا تبعاها خذها وبالفعل على طول ( نقزتها ) بالسيارة ورحت فيها لمحل الحيوانات وغسلوها و سألت صاحب المحل عنها وقال هذي قطوه أمريكية غاليه . وأخيرا أوكد بأن هذه القصة حقيقية واللي مو مصدق يسأل القطوه نفسها
الكابتن / كـــرّوم
العرض العادي
