مدخــل )
لحظات حبست الأنفاس
خفقت لها القلوب
وتدافعت فيها المشاعر
واستعاد فيها الكل شريط الذكريات
لذلك الأب الحنون الذي رحل عن هذه الدنيا وودعنا
فاجعة عجزت عن وصفها الكلمات
وأيام مرت
شعرت بألمها وقسوتها
يبه شلونكـ ...
ملل هالــكــون من دونكـ ..
يبه شلونكـ ؟؟
وتمضي رحلة الدنيا..بليا طلة عيونكـ ..؟؟!!
يبه شلونك ؟؟
رحمك الله ياأبي
وأسكنك فسيح جناته
عجزت أنا يابوي بالصوت أعزيك
تخنقني العبرة وجفت دموع
لو البكا يرجعك يابوي لاأبكيك
لاشك درب الموت مابه رجوع
ولو الدمع يابوي لو سال يبقيك
لاأذرف كثير الدمع طول السبوع
الله يبيحك كل ماحل طاريك
يرحمك ربي في نهار يروع
عزيز في ربعك حنون بأهاليك
كريم بضيوفك ولو هم جموع
ياما ضعيف الحال شلته بأياديك
قمت وحميته من قريب قطوع
تاقف مع المحنه وهذي مماشيك
ويشهد على قولي كثير الربوع
عساك في الجنه تقطف بأياديك
أثمارها يابوي من كل نوع
عسى العوض من بعد غيبة لياليك
في واحدن لاعه من الدهر لوع
ابوي
وش هالكون بعدك علمني وش يكون؟؟
وش هي الدنيا بدونك غير صمت وسكون!
الصبح شاحب!
والليل تملاه الظنون!
والزوايا موحشه
(فاقده قلب حنون)
عادي كل هالناس عندي يروحون أويجون
إلا انت (يابوي) غيبتك لا ماتهون"..
دقات قلبي تزيد بحرتن فيها
والدمع من مهجتي بالحزن ذرافي
من لوعتن ياعسى ربي يجليها
حمى غشتني بغم وتنفض أطرافي
ليت الليالي تعود بحلو ماضيها
هيهات ترجع بماروح وماطافي
كلن يعزي وانا روحي اعزيها
رحيل ابوي اللي بالأفضال معطابي
آه من الوقت والدنيا أثنيها
دنيا تفرق شمل بالحيل تنعافي
بسمتك ياوالدي مانيب بناسيها
تضحك إذا شفتني بالخير متعافي
ليت العمر ساعته تنباع وأشريها
بأغلى ثمن يايبه للعمر تنضافي
مسجدك مشتاق للآية وتاليها
منبرك من عقب مافارقت له فاضي
وارشلك من عودك برجلك أغطيها
أشم ريحه وكنك مقبل لافي
نظارتك شلتها حزني يبكيها
حتى المساويك لاحت بين الأرباب
عصاك مسنودة جيت أباحاكيها
تقول يكفيني مافيني ترا كافي
بستانك اللي به النخلات تسقيها
يبست سواقيه تمره دون خرابي
يبه يبه يايبه
يبه يبه يايبه
يبه يبه يايبه لمن بطريها
هني من له ابو حي وينشافي
فنجال قهوه معاك اوقات اغليها
ويضمني بالشتا في مشلح دافي
همزت رجليك انا فدا مواطيها
ارجي لبرك عسى ماتشكي خلافي
الأرض ضاقت علي بأوسع فيافيها
ماذقت نوم هلي والأنس متجافي
فضايلك يايبه عجزان اوفيها
لووصلت بالشعر بيت الألف من
قافي
يارب تجعل إلى الفردوس ناصيها
ومن ثمار الجنان الخضر قطافي
يبه وينك ؟
ولهت لنظره من عينك ....
يبه وينك ؟؟
اشوفه طوّل غيابك !!
و من ودّاك .... ما جابك !
قالوا ما يدوم الزين !!
و انا عندي امل للحين ..
و لا كني اعرفك وين !!
يبه وينك ؟؟
عسى الداعي يبه بس خير ؟!!
عساك بخير ....!!
مداين تكرم لعينك ...
بس ارجوك علمني ...
علمني .. يبه وينك ؟؟
سألت امي عن رجوعك ...
ولا كني اعرفك وين !!
و قالت ..
ما يدوم الزين !!
و انا .. عندي امل للحين ..
في رجوعك !!
يبه بس تكفى علمني ....
متى رجوعك ؟؟
يبه بس تكفى علمني .
وش احلى من طلوع اثنين ؟؟
طلوع الشمس .... و طلوعك
يبه وينك ؟؟
سألت امي ...... غيابك طال ؟؟
ولا كنّي اعرفك وين !!
و قالت مثل ما قالت ..
حسافه ...
ما يدوم الزين ...
مع كل هذا صدقني ..
انا عندي امل للحين !!
سؤالي عنك يالوالد ..
صار كما الموال
و اشوفه طال ...
والله طال ..
حزين .. بلحنه و حروفه ...
يخاف .. يموت من خوفه ...
و قلب ٍ كان اقوى قلب ...
ضعف .. من قسوة ظروفه ..
يبه ..
ارجوك علمني ...
تشوف اللي انا اشوفه ؟؟
انا اشوفك نهار و ليل ...
في وسط المجلس تصلي ..
و تدعي الرب ييسر لي ..
يبه ..
ما عاد بي من حيل ..
وين الحيل ؟؟
و انا اشوفك نهار و ليل ..
مع اني ادري ما ترجع !!
غريبه .. بعدها تدمع ..
عيوني من هموم البين !!
و ادريبه مكانك وين !!
مع َ هذا .. ارد و اسأل !!
يبه ....
وينك ؟؟
و لا كني اعرفك وين !!
شبكت العشر في غيابك ...
على راس ٍ كساه الشيب ..
و من وداك ... ما جابك ..
و لا ادري وش يخبي الغيب !!
و جرح ٍ عذ ّب احبابك ....
يبه ..عيّا يخف و يطيب !!
يبه.. كل جرح في الدنيا ..
مصيره بالدوا يلتم ...
و لكن البلا من جرح ..
نزف فرقاك ... بليّا دم !!
و هذا الفرق في جرحي ...
عجز يلقا الدوا دكتور ..
انا جرحي غريب الطور !!!
ينزف ... بس بليّا دم ..
و زاد الهم فوق الهم ...
و دام انك يبه غايب ...
جروح الغيبه ما تـلتم ..
بس عندي امل للحين !!
و لا كنّي اعرفك وين !!
يبه .. ذكراك تفرحني ....
في نفس الوقت تجرحني !!
لا من جبت في طاريك ...
دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس ..
كل ٍ كان في بيتك ضيف ..
الا يا حيف .... الا يا حيف ..
زمن قاسي ..
زمن قاسي ...
اخذ مني بلا رحمه
اخذ مني اعز ناسي !!
و خلاّ لي سهر هالليل ..
في عيني ضيف ..
الا يا حيف !!
يبه وينك ؟؟
تعال و شوف ...
كبرنا مثل ما تمنيت .
درسنا كل ما حبيت ..
نصلي مثل ما وصيت ..
و ندعيلك في كل ظروف ..
يبه وينك ؟؟
تعال و شوف ..
صحيح الدنيا ما ترحم ..
تجرعنا التعب انواع ...
و لكن الأمل ما ضاع ..
و انا عندي امل للحين !!
و لا كني اعرفك وين !!
يبه تذكر شطانـتـنا ؟؟
انا و اخواني و اخواتي ...
معانا عيال حارتنا ..
نلعب في زوايا البيت ..
يبه ... والله انا حنيت ..
لذاك الوقت في وجودك ...
الا يا ليت ... الا يا ليت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ...
خذتك بعيد .. و خلتنا !!!
يبه امي تذّكرنا ...
بأيامك قبل ما تروح ...
تناديها.. يا روح الروح ..
تغازلها و تنظر لك ..
مثل طفله ...
ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. او بعد منها ... كنا نغار
نحبك يا يبه ... ارجع
مثل شمس الفجر .. اطلع
حزينه الشمس في غيابك ..
و نفس الحزن في احبابك ..
واخاف الشمس من حزني ..
تغيب و ما بعد تطلع !!
يبه ارجع !!
اذا لي خاطر فـ قلبك ..
تعال و زورنا بس يوم ...
مع انه ما يكفينا .. نشوفك يوم ..
نبي حضنك يدفينا .. و نشوفك دوم ..
لكن قلّت الحيله ... و يمكن مـ البطا ضاعت ..
و قلنا يوم !!
يبه سامحني بترخّص ...
قبل ينشف حبر الأقلام ..
كلامي بعده ما خلّص ..
و لكن موعد الأحلام ..
حان .. ولازم اوفي له..
بعد ما ضاعت الحيله ..
اشوفك والوعد باكر !!
اذا فكّر يجي باكر ..!!
و برجع اسألك وينك !!
بس لازم تجاوبني ..
ترى عندي امل للحين !!
و لا كني اعرفك وين ..!!
مخـــرج )
مولاي
انت أعلم بمايجول في نفسي
انت اعلم بحالي
إلهي
قد تفطر قلبي شوقآ إليه
اللهم ثبت قلبي و صبرني وأأجرني
اللهم انه تحت رحمتك
أنت أعلم بحاله في لحده
اللهم اخرجه من ضيق اللحود
إلى سعة جنات الخلود
اللهم وسع مدخله
وآنس وحدته
وأنر عليه ظلمته
واجمعني به في الفردوس الأعلى وأمواتنا وأموات المسلمين
اللهم واستجب دعواتنا..
أدعـو لأبوي وجميع اموات المسلمين بالرحمه والمغفره
والله يحفظ آباؤكم لكم
ويحميهم من كل شر
ويطول بأعمارهم على طاعته
يبه شلونكـ ...ملل هالــكــون من دونكـ ...
العرض العادي
