العودة   منتديات الـــود > +:::::[ الأقسام الثقافية والأدبية ]:::::+ > منتدى القصص والروايات
موضوع مغلق
   
 
أدوات الموضوع تقييم الموضوع انواع عرض الموضوع
قديم 16-02-2009, 03:35 PM   رقم المشاركة : 1
^اسـيرة*الشوق^
( ود فعّال )
 
الصورة الرمزية ^اسـيرة*الشوق^
 






^اسـيرة*الشوق^ غير متصل

Icon1 (( مصــيرهـا تحــبنـي ))

هلا شحالكم (مصيــرها تحبـــني) روااية رووووعه


وللامانه منقووله وللكاتبه (فووواغي)


واتمنى انها تعجبكم وراح انزل الجزء الاول واذا في تفاااعل راح اكمل

وشكرا.....



(الجزء الاول)
-11 كان يوم مهم بالنسبه لعايلة( بو محمد) تختلط فيه الافراح والاحزان سبحان الله كيف جي ؟ *نبذه بسيطه عن العايله *
(بو محمد عمره 35 سنه..وعايلته تتكون من بو محمد وام محمد جي يزقرونهم، الله مارزقهم بعيال من عرسو لين سبع سنين، و هذا بو محمد مايأس لين ما الله راد وحملت ام محمد .. لكن الله ماراد فرحتهم اتم!! الله عطاهم بنت شرات القمر لكن خذ روح ام محمد عقب مايابت البنت.. اختلطت مشاعر بو محمد بين الفرح والحزن كان فرحان لبنته الي ترياها سبع سنين وحزين لفراق زوجته وحبيبة قلبه .. بو محمد عنده اخت واخويين، اخته تعيش في بوظبي ويا ريلها، واخوه يعيش في العين وواحد وياه في دبي كلهم عندهم عيال والحمدلله .. التفاصيل في القصه )
بو محمد حاظن بنته ويصيح شرات اليهال واخوه يهديه .. لكن منو بيوقف بو محمد... واخته (شمسه ) تصيح وياه مب رايمه تتخيل انه البنت تيتمت من اول ماطلعت للدنيا .. كان جو الحزن مخيم على العايله بكاملها وبخاصه بو محمد ماعرف كيف يتصرف ويا بنته .. ومرن ايام العزا بطيئات ولما خلصن ايام العزا الثلاث للناس، العزا بالنسبه لبو محمد كان العمر كله عاهد نفسه انه مابيحسس بنته باي نقص .. لكن عايلة ام محمد كانت تطالب بالبنت الي بعدها ماتعرف شو مصيرها في ها الدنيا .. بعد مناقشات قرروا انه البنت تكون في بيت اهل امها لين ماتكبر شوي وبعدين ابوها ياخذها .. بو محمد يالس ويا بنته يطالعها ويتذكر موقف استوا قبل لاتي بنته وكانت غناة روحه حيه
بو محمد : ها شو ناويه تسمين اللي في بطنج لو كان ولد
ام محمد : بسميه محمد .. مب يزقرونك بو محمد خلاص محمد ان شا الله
بو محمد : ولو كانت بنت
ام محمد : تسمح لي اسميها على ذوقي
بو محمد : انتي اختاري وانا اقول تم
ام محمد بابتسامه ذوبت روح بو محمد : بسميها ((فـــواغــي ))
بو محمد : والله وعرفتي تختارين اسم غريب ونادر ..
ام محمد : شفت انا الذوق كله
ورجع بو محمد لواقعه بس بدون ام محمد وقرر انه يسمي بنته فواغي خلاص .. ومحد اعترض لانها هاي رغبة المرحومه قبل لاتموت والكل كان يعرف ..
ويا الايام ..
خلاص فواغي ظهروها من المستشفى وسارت بيت ام امها يعني يدتها وهي بعدها بنت اسبوع .. ملامحها مابينت بعدها لانها صغيره
والكل كان يشفق على حال البنت اللي تيتمت وهي صغيره
وهم يالسين في الصاله ..
خال فواغي اسمه حمد عمره 10 سنوات بعده صغير .. مريم اخت المرحومه عمرها 19 وماكان عند المرحومه اخوان غيرهم
مريم : فديت ها الويه انا اميه فوغوه على منو ظاهره جي حلوه
ام حمد : طالعه على اختج الله يرحمها ( وتدمع عيونها لما ذكرتها مريم عرفت انه امها بتفتح مناحه ) خلاص امايه دموعج ماتفيد ادعي لها بالرحمه ياميه
ام حمد: الله يرحمها
حمد : مريوم انا بشلها
مريم : لا بعدها فوغوه صغيره بعدين شلها
ومرت الايام .. وكل يوم بو محمد يي وييلس ويا بنته بالساعات، هم قالو يبونها عندهم كيفهم يتحملون يلستي عندهم وفواغي كبرت ماشا الله عليها وكانت بيضا وشفايفها صغار وحلوات جنهن مرسومات رسم وعيونها كانت سود لكن اللي يميز عيونها انه البياض اللي كان في عيونها بياض مب طبيعي والسواد اسود سواد الليل يعني فرق بين الابيض ابيض والاسود اسود فطالعات حلوات وشعرها كان ناعم وقصير كانت بعدها بنت اربع سنوات ماتفتهم كانت تسير الروضه لكن يا الوقت اللي بو محمد يطالب ببنته .. وطبعا خذها، لكن مريم سوت مناحه خلاص تعودت على وجودها في حياتهم اربع سنوات هب هينات وحمد بعد لكن ابوها مصر انه ياخذها وقال انه كل يوم بيوديها عندهم فواغي ماكانت وايد ويا عيال عمتها وماكانت تعرف حد في حياتها غير مريم ويدتهاوحمد وابوها بس .. كانت حياتها مقتصره على هاييل الاشخاص .. مرن الايام وقرر بو محمد يتزوج وكانت فواغي بعدها بنت سبع سنوات كانت اول سنه في المدرسه واونها شاده حيلها .. مرت بو محمد تقبلت وجود فواغي بحكم انها صغيره بس ومافي مرت ابو قلبها طيب الا نادر ماتلقون .. ويوم صار عمر فواغي عشر سنوات كانت فواغي توها تستوعب الدنيا وبدت تفهمها توها تدرك اللي يصير حواليها وبدت رحلة العذاب لفواغي .. صحيح ابوها مب مقصر عليها بشي لكنه كان يخاف عليها وايد كان يخاف عليها من كل شي ومسولها قسم خاص الها في البيت كان مسولها صاله وحجره وحمامها ومحد كان يزعلها.. فواغي تربت على الدلع والعز لانه هذا العهد اللي ابوها قطعه على عمره من يوم كانت ياهل .. حرمت ابوها يابت ولد فواغي كانت تحس بالغيره من هذا الولد وخاصه تعرف انه هاي االام مب امها وكانت دوم تسالهم وين امها كان على بالها امها عايشه لكن مطلقه هذا اللي كان على بالها .. وفي يوم من الايام في مدرسة فواغي ( مدرسه خاصه طبعا )
ميره ربيعة فواغي : فوغووه
فواغي : ها
ميره : انتي وين امج ماجد شفناها
فواغي : امايه ابويه طلقها وعرست واللحين ويا ريلها
ميرة : عيل انا سمعت شي ثاني
فواغي : شو ؟
ميرة : انه امج مااااااااتـــــــــــــــت
نزلت ها الكلمه مثل الصاعقه على راس فواغي من عشر سنين وهي ماجد شافت امها وللعلم فواغي كانت حاسه بها الشي وكلام ربيعتها اكد لها
فواغي تمت ساكته وتفكر.. ( انا بدون ام .. يعني انا يتيمه .. ليش كل البنات عندهم امهات .. وانا لا .. ليش حمود اخويه عنده ام وانا لا .. ليش ماشفت امايه ليش حرااااااام عليهم ؟؟) وبدت تصيح وتصيح ودق جرس الفسحه ميره ربيعتها سارت عنها ويلست تصيح وسارت قالت انها تبا تروح وقالت لهم بانها مريضه روحت البيت حصلت مرت ابوها يالسه
شيخه : ها فويغ رديتي ليش راده بخبر عليج ابوج اكيد مسويه شي
فواغي : والله مب مسويه شي بس تعبانه شوي ابا ارقد
شيخه : يارج الله شو يعورج يالمبزايه انتي انا ادريبج ماتبين تدرسين ( وبدت تعصب بدون سبب) يلا سيري حجرتج .. مادانيج ولا ادني شوفتج ولا ادني طاريج يالدلوعه
فواغي تعودت على ها الحياه كل يوم نفس الكلام لكن اليوم فواغي تعبانه نفسيا ويلست تصيح امها حتى غدا ماتغدت يحليلها تتحمل هموم هي مب قدها بعدها بنت عشر سنين ومر عليها اسبوع وهي نفس الحاله وشيخه مرت ابوها كل يوم نفس الموال تكرهها في البيت ومرن 4 سنين وفواغي تعاني وماتشكي لحد حتى ربيعتها ماتقول لها ومريم خالتها عرست وحمد خالها ماتعرف كيف تشكي له وجمالها زاد وشعرها طول واستوت فواغي ملاك يمشي على الارض .. فواغي كبرت وكبر عقلها صارت تفهم كل شي يدور حواليها .. فواغي فطنه بطبيعتها لكن فيها غرور وكبرياء شايفه عمرها وايد وفواغي متحرره وايد يعني فري بسبب ربيعتها ميره والشله اللي وياهم وفي يوم من الايام الحال ضاق بها من حرمة ابوها
فواغي : ابويه
بومحمد : عيونه
فواغي : بغيتك في موضوع
بومحمد : امريني
فواغي : ابويه حرمتك انا ماطيقها كل يوم تسبني حتى اللعن قامت تلعني .. ابويه دخيلك روف بحالي انا مالي حد في الدنيا غيرك ابويه احس الدنيا ضاقت بي لا ام تشفق عليه ولاحنان انا محرومه ابويه منها محرومه حرام عليك ابويه ارحمني دخيلك
بومحمد دمع لكلام بنته عمره ماكان مقصر عليها بالفلوس لكن مقصر عليها بالمشاعر اللي أي بنت تحتاجهم بو محمد حضن بنته اللي كانت ترفض انها تنزل دموعها جدام أي حد مهما كان لكنها استسلمت لانها مارامت تتحمل اكثر الظيم اللي اييها
بو محمد : خلاص فواغي حبيبة ابوها محد بيضايقها مرة ثانيه
انتي سيري قسمج وهاي شويخ والله ماخليها تسوي لج شي انتي لو بغيتي شي تعالي قولي لي
فواغي مسحت دموعها وابتستمت
بو محمد : هي ابتسمي جي فديتج والله
سارت فواغي حجرتها ورفعت السماعه تدق لميره
فواغي : الو
ميره : الو هلا فوغوه
فواغي : اهلين .. شحالج ؟
ميره : تمام وانتي
فواغي : عايشين
ميره : احس انه فيج شي
فواغي : شوي ضايقه
ميهر : تبينا نظهر نحوط وتغيرين جو
فواغي : لا مالي خاطر
ميره : خلاص على راحتج لاني انا بظهر بسير الستي
فواغي : عيل خلاص بخليج
ميره : اوكي عقب يوم برد بدق لج
فواغي : اوكي خلاص باي
ميره : باي
اللي ماتعرفونه عن ميره انها بنت توشك على مستقبل دامر لانه امها وابوها مطلقين وهي ماخذه راحتها ابوها يصرف عليها
فواغي يلست تتدرس لانها شاطره وبعدين خلصت المدرسه وبدت اجازة الصيف وفواغي صار عمرها 14 كل ما كبرت كل ماحلوت أكثر، بيضاها الحلو والهادي وعيونها اللي تذبح وشفايفها المرسومه وخشمها اللي شرات السيف طالعه على امها حلوه .. فواغي طايحه على شبريتها وتلعب بخصلات من شعرها ويحدر عليها ابوها
بومحمد : الحلوه شو تسوي ؟
فواغي : ماشي شوفة عينك يالسه
بومحمد : فواغي حبيبتي انا ييت اقولج اني بسير بيت عمج في العين يوم الاربعاء وقلت بوديج ويايه عند عيال عمج عشان تتعرفين عليهم انتي ماتعرفينهم فهاي فرصه يعني تتعرفين على قوم عمج
فواغي استانست واخيرا بتسوي صداقات : صدق والله خلاص بتلبس وبكون جاهزه باجر انته متى بسير ؟
بومحمد : بسير الصبح ان شالله
فواغي : خلاص عيل باجر بكون جاهزه
بو محمد : خلاص الغاليه بخليج
فواغي : اوكيك
وظهر عنها بو محمد ويلست فواغي تفكر كيف بنات عمها وعيال عمها .. يحليلها ماتعرف انه مايحبون البنت الفري وبعدين دقت لميرة وقالت لها تي بيتهم


ميره يت بيت فواغي ..
وكانت شاريه موبايل يديد
ميره: طالعي موبايلي شريته امس من الستي
فواغي : مبروك
ميره : بلاج فوغوه نفسج خايسه لانه ماعندج موبايل
فواغي :/ انا لو ابا بظهر لي موبايل بس خليني ااشر لكن انا مالي حايه فيه
ميره :بالعكس لج حايه اللحين الموبايل موضه ونادر ماتشوفين بنت ماعندها موبايل الا بنات عفانا الله يعني بنات الفقر
فواغي : بالعكس انا ها البنات يكبرن بعيني
ميره : يالله انزين انا مليت مابتين نظهر نسير صحارى
فواغي : اوكي يله بس بزقر الشغاله
ميره : يله اوكي وانا بسير اركب السيارة
فواغي : اوكيك
وسارن صحارى .. فواغي على راحتها تظهر وترجع وطبعا ماكانت تلبس شيله عادي وكانت حلوه حلوه رغم انها ماكانت حاطه شي طبعا ميرة راعية حركات لكن فواغي مايعيبها ها السوالف اكره شي ها السوالف صح انها فري ماتلبس عباة وشيله لكن ماتحب ها السوالف وكانو يالسين وفواغي محتشرة تبا تلعب اللعبة اللي تدور لكن ميرة تزيغ سارت تركب مرة ومرتين
واحد طايف شاف ميرة من هاييل الخفاف قال خلني اقردنها طاف
.......: سلمي انزين
ميره اطرطرت من خاطرها اونها طبته وهي في خاطرها ترمسه
ورد حدر من صوبها : احم احم شحالج ؟
وهني خلصت فواغي اللعبه نازله مدوخه وسارت صوب ميره
فواغي : ميروه الله يخسج انتي هني والله انه جلبني وجلب جبدي
ورد يطوف يوم عرف اسم ميره
....: ميرة حياتي
فواغي بقرت لانها ماتعرف عن ها السوالف على عكس ميره اللي كانت خبره وهي بعدها صغيره
فواغي : ميروه منو هذا
ميره : مادري والله طفره
فواغي : طبيه انا يوعانه ابا آكل
هاك من شاف فواغي تخبل من حلاتها اول شي ماشافها عدل يوم ركز تخبل سارت فواغي تطلب ولحقها وهد ميره
......: الغاليه ممكن
فواغي التفت ..
فواغي نظرة كلها كبرايء وغرور : نعم امرني
..........: ممكن رقمج ( ويهه لوح )
فواغي : والله تهبي شو قالو لك بنت شوارع صايعه انا بنت ناس
........: بس عن اذنج يعني ماشي دليل انج بنت ناس
فواغي حرجت : شو قصدك ؟
........: طالعي لبسج لا عباه ولاشيله وانتي شكلج يعني هب صغيره وتقولين بنت ناس
فواغي دمعت ماتحملت كلماته كانت صواعق تنزل على راسها " ليش يقول جي ,, لييييييش طالعت نفسها شافت البنطلون والقميص و الايد قصيره والشعركله ظاهر وصدقه شكلها يعني هب صغيره بتسير ثانويه وينج يامايه وينج لو كنتي موجوده جان قلتي لي البسي عباه وشيله جان سرتي وييتي ويايه ومحد يتحرش فيني اللحين كلهم يطالعوني امايه قالو لي انا هب بنت ناس امايه انا بنتج طالعي شو قالو لي "
والولد واقف جدامها متلوم من نفسه لكن اللي قاله صدق وكانت حلوه حتى وهيه معصبه
فواغي دمعت : انا بنت ناس غصبا عن عينك تفهمني تخبر انا بنت منو انا بنت ابوي رباني احسن تربية شو شايفني اغازل خلق الله شراتك يالصايع من وحده لين وحده ماقول الا تفو عليك وعلى ها الاشكال دامك انته من شباب البلاد (قويه والله هالفواغي )
والاولاد يطالعونها ويطالعون الولد وفاطسين من الضحك .. الولد ويهه عوره من رمستها وسارت فواغي السيارة وماحبت تنزل دموعها وتقول في خاطرها " افففففففف وين ميروه صدق انه الموبايل فايده بسير البيت بخلي ابويه يطلع لي موبايل ومرة ثانيه هب ظاهره وانا بليا عباه وشيله وبراويك يالخايس "
فواغي : بوبكر
بوبكر : نعم
فواغي : عطني موبايلك شوي بدق حق صديق مال انا
بوبكر / يودي
فواغي تدق لميره
ميره : ها انتي وين ؟ اختفيتي مرة وحده
فواغي : تعالي انا ابا ااروح بسرعه واللحين تعالي السيارة بسرعه ولا بسير تراني
ميره : افا مايلسنا مرة ثانيه مابيي وياج
فواغي : يعلج ماييتي انا ابا اررووووح تسمعين ولا لا
ميره : هيه هيه اسمع يابوج اللحين بيي
ميره سارت السيارة وهي معصبه وركبت ودقت بالباب
وصدت صوب فواغي
ميره : انتي بلاج بلاج ؟ مب طبيعيه
فواغي : الا طبيعيه ونص
ميره : عيل ليش محرجه
فواغي : ماشي سلامتج
ميره : صح تعرفين هاك الولد قال يبا رقم موبايلج
فواغي : والعثره تعثره الهرم ها التعبان
ميره : هب هب هب بلاااااااااج ؟ حرام عليج ماسوا شي
فواغي : عنلات ويهه الخام انا براويه
وميره يالسه تلعب بموبايلها ودقت له
,,,,,,,,: مرحبا الساع
ميره : مرحبتين
........: شحالج ميووره ؟
ميره : يسرك الحال
من سمعت فواغي " يسرك الحال " انصدمت
فواغي : حوووووو انتي منو ترمسين ؟
ميره بنذاله : ارمس التعبان على قولتج
..........: منو التعبان ؟؟
ميره : هاي اللي انته تضاربت وياها قالت عنك تعبان شفت عاد
فواغي انقرهت مووت منها وهي بروحها فواغي مب ناقصه
..........: ميووره عطيني رقم موبايلها دخيلج
ميره : للاسف ماعندها موبايل ياحليلها بنت فقر
فواغي وصلت البيت : ايييييييي لا تغلطين فقر اللي يابوج
سكرت الباب ونازله البيت وهي معصبه حدها يعني لو شافت مرت ابوها وزادت ها الليله ما بتعدي على خير فواغي من كثر الحرجه قامت تدق بالكعب بصوت عالي وحمدت ربها مليون مره انها ماشافت مرت ابوها وهدت عمرها فوق الشبريه وخلت لدموعها المجال انهن ينزلن على كيفهن ويعبرن عن مدى الحزن اللي فيها اللي يشوفها يقول ها الانسانه بحلاتها هاي ماعندها هموم لكنها انسانه حلوه مكسورة من داخل حتى لو شفتوها تضحك فهاي الضحكه مبب معناتها انه مب حزينه من كثر التعب رقدت بثيابها ونشت الساعه ثمان اليوم الثاني سارت تسبح نشفت شعرها ولفته بطريقه حلوه ولبست بدي وردي في نك وبنطلون جنز فيه لمعه شو ي من تحت وحطت جحال على كامل عينها وهاي اول مرة تجرب الجحال ولبست اكسسوار لونه وردي وكانت ناشه فرحانه على اساس انه بتكون صداقه نيو وكان ويهاا كله فرح وتفاؤل وطالعه هاديه ونعومه حتى اللي مايطالع بنات بيطالعها من حلاتها نزلت شافت ابوها يتريق
فواغي : صباح الخير
بومحمد انبهر من جمال بنته : صباح النور هلا والله ببنتي حبيبتي
ويلست فواغي على الطاوله وتريقت ويا ابوها والفرح كله فيها وع الساعه عشر تحركوا
وصلو العين جي ع الساعه 12
فواغي : استحي احدر داخل محد ويايه
بو محمد : عادي بنتي احدري داخل هاييل بنات عمج مب غرب
وسارت فواغي داخل حصلت مرت عمها عايشه كانت طيبه ومن شافت فواغي على طول عرفتها لانها كانت تشبه امها وايد لكنها ماعيبها انها بلا شيله وبلا عباه
عايشه: هلا والله توه ما نور البيت ببنتي هلا
فواغي : شحالج خالوه ؟
عايشه : بخير الحمدلله انتي شحالج ربج الا بخير
فواغي : الحمدلله نشقح
وين البنات يسلمن على فواغي هن ثلاث بنات وحده اسمها موزه عمرها 22 ووحده هند عمرها 19 ووحده مهره عمرها 17
سلمت عليهم كلهم انبهرو من جمالها كان جمالها رباني لكن نفس الشي اللي نقدوه عليها انها هب متغطيه
موزه : هلا والله توها العين نورت
فواغي : منوره بوجودكم
هند : شحالج فواغي
فواغي : بخير الحمدلله انتو شحالكم
مهره : كلنا بخير .. فواغي تشربين شي
فواغي : لا مشكورة الغاليه
ويلسو يسولفون شويه اندمجو وياها في السوالف .. الا انه مهره مب راضيه تبلعها
موزه : فواغي تبين تصلين ؟
فواغي : هيه
تعالي ويايه
مهره : شو هاي شكلها صايعه
هند : عيب عليج هاي بنت عمج مهما كان
مهره : ماعترف بها الاشكال
هند : ماشالله عليها عيني عليها بارده حلوه تخبل تعذب بقردنها
مهره اللي منقهره : ماعندج ذوق
هند : حرام عليج
مهره : والله من صدقي
وسارت فواغي تتيدد وتصلي موزه ظهرت عنها عشان تصلي على راحتها يوم خلصت دعت ربها انه يطوف ها اليوم على خير لانها تحس بانها غير عنهم طبيعتها غير عن طبيعتهم ..
وهي ظاهره سمعت صوت باب حجرة ينفتح في الممر مانتبهت كملت دربها ،،كان خالد توه ناش من النوم ووييه منفخ ومعتفس وحالته لله خالد عمره 16 اكبر عن فواغي بسنه وعلى باله فواغي اللي تمشي هاي مهره نفس الشعر من ورا ونفس الجسم
خالد : مهرووه
فواغي صدت ..
خالد تقرب منها بعده مسطل .. ويوم شافها : بسم الله الرحمن الرحيم
فواغي ضحكت عليه شكله خبيل : هههههههههههه
خالد : انتي منو ؟
فواغي قالت ها اكييد اخوهم ..
فواغي : انا بنت عمك
خالد : اووووووووووه شيت ماحلاج
فواغي استحت ونزلت .. تم مبقر معقولة بنت عمه لها الدرجه حلوه يالله من متى ماشافها ولا مره في حياته لكن استغرب من شي واحد ليش ماتغطت عنه يوم رمسها وكانت لا لابسه بنطلون وقميص وها الشي منقود رد حجرته تلبس وتسفر وتكشخ اونه عشان فواغي فشله عقب ماشافته منفخ ومعتفس نزل وهوه يدن دن على أغنيه :: وش ذا الذي عيوني تشوفه ... وجه البدر او مطلع الشمس .. الله يامحلى وصوفه ... بالحسن هذا ببصم بخمس :: وخالد كان صوته رووعه لكن خيبة امله ماحصلها في الصاله

كانو يالسين يتغدون في حجرة الطعام ..ويوم خلصو سارو الصاله
موزه : فواغي .. كيف حالج انتي هناك ؟
فواغي : انا بقولكم حالي اني ملانه طول الوقت عندي ربيعة وحده اسمها ميرة .. بس ميرة هاي ماحب تصرفاتها انا ادري انكم مستغربين اني انا بدون عباه ولا شيله انا ماعندي ام ماعندي حد يقول لي لبسي عباه ماعندي غير ربيعتي يوم ابا اسير اشتري ثياب هي تي ويايه تتنقى لي ثيابي انا بعدني صغيره .. ( دمعت عيونها ) انا بـــــــدون ام
مهره من سمعت كلامها حست بجزء بسيط من معاناتها ..
هند : ومرت أبوج
فواغي وعيونها تلمع من الدموع اللي فيهن : هــه مابغيتو غير شيخه .. شيخه لو شافتني تلعن وتسب ..لكن جدام ابوية اونها ملاك
موزه : انتي عندج حجرة
فواغي : الحمدلله ابويه مب مقصر عليه .. سوا لي حجرة وصاله وحمام يعني نفس جناح عشان ماتلاقى ويا شيخة وتسوي لي مشاكل
مهره بدت تحن لفواغي ..
موزه : فواغي يعني انا اسفه لو فيها احراج لكن اعتبريني شرات أختج العوده انتي لازم تلبسين شيله وعباه لانج انتي مب صغيره وبنت ماشالله عليج واللله تعقين الطير من السما وانتي بنت ناس حشام
فواغي : انتي قولي لي منو بيوديني وانا بقولج حاضر
موزه : شورايج تباتين عندنا
هند : والله فكره ..
مهره ماعلقت على شي ..
فواغي : ماتوقع ابوي يرضى
موزه : ماعليج بخلي امايه ترمسه
فواغي : انتو عندكم اولاد صح ؟
هند : هيه عندنا بس عادي .. انتي مابتيلسين وياهم
فواغي : لا لا مافيني خلوها مرة ثانيه
موزه : اوكي تعالو حجرتي ..
مهره : انا بتم في الصاله اطالع التلفزيون
هند عرفت مهره ..
وسارو فوق يلسو يسولفون وفتحت موزة لاب توبها تراوي فواغي أشياء وشبكت موزة بالنت وفتحت ايميلها ويلست ترمس ربيعتها
فواغي : شو هذا ؟
موزه : هذا المسنجر يعني تسولفين ويا ربيعاتج وجي
موزه فتحت لها مواقع ومنتديات ويلست تطالع فواغي اعجبت بها العالم .. لكونه عالم ثاني يختلف عن ها العالم
هند : انتي ماعدج نت
فواغي : لا ماعندي
هند : اها قلنا لو عندج نت جان ضفناج على ايميلاتنا
فواغي : يوم بحط يووم بحط
ودشت مهره ..
مهره : ممكن ايلس وياكم
فواغي و موزة : حياج
ويلست وياهم مهره . وبعدين اندمجت وياهم في السواف ويالسات يخبرون فواغي كيف النت وشو فيه .. وتقولهم مهره يوم كانت تحدر الجات تقص على البنات وتقردنهم وتضيفهم على الايميل وبعدين تعطيهم رقم خالد اخوها وهوه ييلس يرمسهم
فواغي : هههههههههه والله وناسه
مهره : فوق ماتتصورين .. احيد مرة قردنت وحده وتمت متخبله تبا رقمي وانا قلت لو بدق لي بتسمع صوت بنت شو اسوي ؟ جان اسير واعطيها رقم خلود اخويه وخلود شله ويعطيها من هاك الدبس وصدقت واتيمت بخلود وخالد اتيم بها عاد ماعرف اذا هوه للحين وياها او لا
فواغي : أي واحد خالد ؟
مهره : خالد هذا اصغر عني بسنه
فواغي : اممممممم شكله طويل وضعيف صح
مهره : هع هع هع شكله سلق بس كيف عرفتيه ؟
فواغي : يوم خلصت صلاه ظهرت جان اشوفه على باله انتي اانا
مهره : اوووه انا اشبهج ياحظي والله
فواغي : هههههههههههه
هند استانست لانه مهره اللي كانت مب طايقه فواغي حبتها بظرف اقل عن ساعه لا واستوت سوالف وياها .. وبعدين أذن العصر
وسارو يصلون كلهم وبعدين دش خالد ماصدق عينه يوم حصلها كان يبا يشوفها
خالد : يامرحبا الساع باهل دبي
فواغي مستحيه : مرحبتين
مهره : عيب عليك خلود اظهر
خالد : اييييي لاتقولين خلود قولي خالد
مهره : انزين اظهر
خالد : اول شي ابا اعرف هاذي منو ؟
مهره : هاي بنت عمك عبدالله
خالد : احلفي عمي عبدالله اللي في الميلس اللي بيتهم في دبي ماغيره
مهره تضحك على خبال اخوها : هههههههههه هيه هوه
خالد : بس هاي ليش ماتينا انا اول مرة اشوفها
مهره بدت تعصب : خلوود اظهر والله الاخبر عليك هزاع
خالد : لا لا كله ولا هزاعوه بيسوي لي فيها سالفه عن اذنكم بووويه..... وبااي مادري شو اسمج
وظهر على طول وهوه يفكر في فواغي ماحلاتها والله قمر .. وقرر يهد اللي عنده عشان فواغي .. لكنه خالد ماعيبه انها وايد فري هذا اللي مسونه
وبعدين قال بو محمد انه بيروح وبياخذ فواغي
فواغي سلمت عليهم : عاد لاتقطعون دخيلكم انا بروحي محد ويايه في البيت صح ويايه مرت ابويه وولدها لكن انا طول الوقت في حجرتي وملل
موزه : فديت روحج فويغ ان شالله بتيين ومابنقطعج الغاليه وحظنتها موزه
هند : افا عليج فوغووه ماطلبتي مابنقطعج انتي تامرين امر
مهره اللي حست بانه فواغي مظلومه واللي ظالمنها الزمان وتحتاج انه حد يكون واقف وياها سارت وحظنتها وهذا اخر شي كانت تتوقعه هند
وبعدين حدر عليهم هزاع وانبهر من شاف فواغي لكن نقد عليها انها بليا غطا يعني ها الجمال لازم مايتم جي لانه وايد بيتحرشون بها
هزاع : هلا والله ببنت العم
فواغي : هلا فيك
هزاع : الشيخه ابوج يترياج برع اكيد ها المفاليع طفروبج
فواغي : اذا كانت جي طفرتهم انا اباها ها الطفره
هزاع " محلات منطوقها وهي بعدها ياهل وحلاتها ماشالله "
وسارت فواغي وهي طالعه شافها خالد اللي كان واقف عند باب الصاله ويسمع شو كانت تقول قبل لاتروح
خالد : عن اذنج الشيخه
فواغي : امرني
خالد : انتي اسمج غريب شووو قوليه
فواغي : اسمي فواغــي
خالد : حتى اسمج حلو شراتج .. فويغ بوصلج للباب ترا اولاد برع
فواغي : لا عادي مايحتاي ابويه برع في السيارة
خالد : حتى لو تراج بليا غطا وتذبحين الواحد اووه سوري لو غلطت بس اخطفي بسرعه تحيرتي على ابوج
فواغي: هههههههه اوكيك يله
ويوم طلعت .. الاولاد كلهم يصفرون ويزاعقون وخاصه شباب فريجهم ..خالد حرج لانها بنت عمه ومايرضى عليها وكانت فرصه انه بو محمد يرمس بنته في ها الموضوع ولانه كلهم نقدو ها اشي
وبعدين اصلا فواغي فكرت انها تلبس عباه وشيله من يوم استوا لها ها الموقف يوم في صحارى..




لازم تعطونـــي ردوود عشان اييب الاجـــــــ.زاء الباقية ......................







التوقيع :
اضغط على الصورة لفتحها بصفحة مستقلة

قديم 17-02-2009, 09:00 AM   رقم المشاركة : 2
الجذااابة
( وِد ماسي )
 
الصورة الرمزية الجذااابة


وهـ بس معناتها بالاماراتي واغشياهـ >> تعلمتها من شموس

رواية خطييررررررة

ماشاء الله عليك رواياتكـ كل وحدهـ تقول الزود عندي من حلاتهم :)

راح اثبت هالرواية بس الين تخلص رواية من رواياتك الي مثبتهـ


بنتظار التكملة :)






قديم 17-02-2009, 01:53 PM   رقم المشاركة : 3
^اسـيرة*الشوق^
( ود فعّال )
 
الصورة الرمزية ^اسـيرة*الشوق^
 






^اسـيرة*الشوق^ غير متصل

ان شاء الله بعد كم يوم بخلص رواية من رواياتي
و على فكــــــرة هاي احلى رواية من بينهم







التوقيع :
اضغط على الصورة لفتحها بصفحة مستقلة

قديم 17-02-2009, 02:02 PM   رقم المشاركة : 4
^اسـيرة*الشوق^
( ود فعّال )
 
الصورة الرمزية ^اسـيرة*الشوق^
 






^اسـيرة*الشوق^ غير متصل

و هذا التكملة لعيون الجذابة

وهذا الجزء الثاني وانشاءلله بيعجبكم واتمنى انكم تردون علي

خالد وقف مكانه يطالعها .. وكل الاولاد يو صوبه
( واحد منهم )
...........: والله قطعة قطعة صاروخ
......... ( ثاني ) : اففففففف عليها تعق الطير من السما خلود منو هاي
....... ( الثالث ) : والله حلوه وربي حلوه انا اول مرة اشوف وحده جي
خالد بس حرج : اييييييييه انتو هاي بنت عمي ومارضى عليها حد يرمس جي عنها
.........: عدال جانها بنت عمك جي ههههههههه ظاهره بليا غطا ولا شي
خالد : بنت عمي حشيم واحشم عنك
........ : يتراوى لك انته بس جي لكن شكلها خفيفه ومن قوم هاييل الصايعات
خالد ماتحمل ويعطيه كف ويتضاربون كلهم لكن 3 على واحد طلعو الدم من خالد وتم خالد ينزف ويوم ظهر هزاع ياله ياله فججهم عن بعض وودا خالد على طول مستشفى توام
في المستشفى ..حطو له مغذي لانه نزف وايد وداوى الجروح ويوم سالوهم بلاه
هزاع : لا ماشي بس طاح من على الدراجه
الدكتور : اها .. بس هو كان ينزف بشده اول مجبتوه لكن اللحين هو احسن وانتظرو لما المغذي بيخلص تأدرو تأخدوه
هزاع : مشكور دكتور
الدكتور : لا ماتتشكرش ده مهما كان ده واجبنا
وسار هزاع صوب خالد
هزاع : انته شو سالفتك ويا الاولاد
خالد:ليش فوغوه ما تتغطى ليــــــــش ؟ قول لي انته ترضى يرمسون عن بنت عمك ترضى انا مارضى

هزاع : خلى فواغي على راحتها امها متوفيه من يوم انولدت وابوها مبزنها ومايحب يقولها شي ولايضايقها عشان جي

خالد : حرام عليك هزاع انا مارضى على فوغوه هاييل اخر زمن ييون يرمسون عنها طالع فوغووه لازم تلبس عباه وشيله ولا انا غصبا عنها بلبسها تسمع غصبا عنها

في سيارة بو محمد.. نفس الموضوع اللي خالد دش المستشفى عشانه بو محمد قرر يفتحه ويا بنته .. ونفس الموضوع كان يشغل بال فواغي
بومحمد : فواغي
فواغي : اصبر ابويه في خاطري كلام
بو محمد : امري
فواغي : ابا اتحجب
بو محمد فرح كان بيرمس في نفس الموضوع وزين انه يت منها عشان مايحس انه غاصبنها
بو محمد : زين زين والله يافواغي اابا اشوفج حرمه حشيم والبنت تراها يابنتي سمعه عاد انتي اختاري من شو تكون
فواغي : اوكي بس مر ابراج الامارات على الدرب ابا افصل لي عباه من ماي فير ليدي
بو محمد : انتي تامرين امر ياروح ابوج
فواغي : ابويه عندي طلب ثاني ..
بو محمد : امري تتدللي عيوني لفواغي
فواغي : ابا نت
بو محمد : بس ها اللي تبينه
فواغي : هيه ها اللي اباه شفته عند بنات عمتي عيبني وايد
بو محمد : انزين كيف ها بعد ؟
فواغي : ماشي تسير الاتصالات تقدم على خدمة الانترنت .. وانا بشتري لابتوب اليوم بسير ويا ربيعتي
بو محمد : بس انا عندي شرط
فواغي : امر ابويه
بو محمد : تسيرين وانتي لابسه عباه وشيله
فواغي : من عيوني يابومحمد
و وصولو ابراج الامارات اشترت عباه جاهزه وشيل وفواغي عندها ذوق حلو وتنقت اللي اشكالهن غريبه وروحو وصلو البيت على المغرب فواغي صلت وسارت تدق لميره
فواغي : الوووووو
ميره بدون نفس (عشان اخر موقف ) : هلا
فواغي : فديتج ميروه بلاج ؟ مايسوى اعذريني والله كنت ضايجه من الحقير هاك انتي وين اسمع عندج حشره
ميره : انا في صحارى
فواغي : فديتج والله انا اللحين بييج ويوم بييج بدق لج تيلفون
ميره : عندج موبايل
فواغي : اووبس لا بس احيد عن ابويه بطاقه وموبايل بخليه يعطيني اياه مؤقت
ميره : اوكي اترياج
ميره صدت صوب اللي تضاربت وياه فواغي اسمه ( حمدان )
ميره : حمدان هاي فوغوه اللحين بتي
حمدان : شي حلووو
-----------------
فواغي لبست العباه والشيله لكن بعدها تظهر شعرها من جدام شويه وتجحلت واستوت عذااااب شكلها استوى مب اقل حلاه عن يوم تكون بدون عباه وشيله وسارت عند ابوها
فواغي : ابويه
بو محمد افتخر ببنته يوم لبست العباه والشيله : هلا والله ببنتي قمر قمر حتى القمر مايي شي عندج
فواغي : ههههههههههه تسلم ابويه من ذوقك .. ابويه انا اللحين بسير صحارى بشتري لاب توب ابغي فلوس وابا اخذ موبايلك الثاني عشان ادق حق رببيعتي يوم بوصل
بو محمد : خلاص بعطيج الموبايل ها وبعدين بطلع لج واحد ثاني لاني انا هذا احتاج له ودوج البطاقه عشان تشترين بها هاب توب مالج لكن مب تخلصين البيزات
فواغي : ههههههههههههههه ابويه هب هاب توب اسمه لاب توب وافا عليك انا مالعب بالبيزات
بو محمد : خلاص تحملي على روحج ودقي لي طمنيني عليج
فواغي : ان شالله
وسارت فواغي وصلت عند الباركنج دقت لميره
فواغي : الو هلا ميروه انتي وين ؟
ميره : انا عند المطاعم
فواغي : خلاص انا بييج
وصدت ميره صوب حمدان
ميره : انا بنش عنك لانه فووغووه بتي اللحين
حمدان : لا ميووره خلج ويايه
ميره : ماروم والله حمودي لا نه هاي فووغوه ماتحب ها السوالف ..

وسارت فواغي وتحس انهم كلهم يطالعونها فاتغشت عشان تستر عمرها أكثر
ميره بعدها يالسه ويا حمدان وطبعا ميره ماتعرف انه فواغي لبست العباه والشيله لانه فواغي اونها بتسوي لها مفاجأة وتشوف فواغي ميره يالسه ويا واحد وتتقرب فواغي من ميره
ميره ماعرفت هاي منو
فواغي : ميرووه
ميره عرفت الصوت
فواغي عقت الغشوه
حمدان انصدم ماتوقع انها بتلبس العباه والشيله لا ومتغشية عيبته اكثر وكبرت بعينه واللي فرحه اكثر انه هوه اللي خلاها تتغير يمكن تقولون هوه السبب الرئسي
ميره : اووه مبروك لبستي عباه وشيله لا ومتغشيه
فواغي : حشمت عمري ..
حمدان : فواغي مبروك على الحجاب والله كبرتي بعيني
ميره تغايظت ليش يقولها جي وانا وانا ؟؟؟؟؟؟؟
فواغي : بعدني ماغيرت نظرتي لك
حمدان : انا غيرت نظرتي لج
فواغي : ميرووه طوفي ويايه بسير اشتري لاب توب
حمدان : اففففففف خطيره لاب توب بعد
ميره : ليش ماعندج كمبيوتر
فواغي : بركب نت
حمدان استانس : حلووووووووووو
فواغي : انا بسبقج مافيني اييب لعمري شبهات
حمدان : أي منو قصدج شبهات
فواغي : صدت عليه : امثالك
حمدان انقهر لو انها دشت خاطره لكن مسحيل يغفر لها زلات لسانها له
وسارت فواغي اشترت الاب توب وحمدان يلاحقهم وبعدين يا ربيعه وياه وكلهم يبون فواغي لكن فواغي ردت الغشوه على ويهاا استر لها عشان محد يلحقها
وبعدين .. فواغي ماتستغني عن لعبتها اللي تدور
فواغي : ميروه لعبتي ابا اسير اركبها
ميره مادري شو يعيبج فيها
فواغي : يوم تجلب
وسارت فواغي تعطي الشغاله الاب توب توديه السياره وعطتها شنطتها وشلت البيزات في ايدها سارت ركبت وبعدين دش واحد وكان المكان زحمه وعادي سار يلس حذالها ردت الغشوه على ويهها ويلست تزقر الفليبيني عشان تلعب في الدور الياي لكن ماسمعها وبدت اللعبه .. اللي كان حذالها حمدان نفسه فواغي مانتبهت له لانها ماصدت صوبه ابد
حمدان : زايغه
فواغي صدت صوبه : انتـــــــــــــــــــه
حمدان : هيه انا انا متحلفلج يافوغووه شرات هاك اليوم
فواغي : انا اللي سويته كان ها الشي الصح
حمدان : لكن كان كلامي فايده صح
فواغي : هيه ..
حمدان : وتراج كبرتي بعيني يوم شفتج جي
فواغي : اكرهك
حمدان حط في خاطره من ها الكلمه الدفشه
وبدت اللعبه تجلبهم وطاحت غشوتها وبدت فواغي تزاعق
حمدان نسى الكلمه : اوووووه يالصواوه صخي
من شافها والخوف في عينها .. زاد اعجابه بها ويوم قامت اللعبه تنزل خلاص يعني خلصت
فواغي استحت لانها كانت تزاعق وقصتهاا كلها ظاهره ردت اتحجبت وردت الغشوه على ويهاا
حمدان : بعدج تكرهيني
فواغي : وزوود لانك يلست حذالي
حمدان : تعالي بتخبرج ليش تبين النت
فواغي : مب شغلك
حمدان انقهر من اسلوبها وتحملها وايد : أي انا ماشتغل عندج ولا عند ابوج تسبيني جي
فواغي : هه لانك ماتعرف انا بنت منو ؟
حمدان : وانتي بنت منو بنت ولي العهد وانا مادري
فواغي لبست نعالها وسار ت تمشي وروحت عن ميره بدون لاتشوفها لانها معصبه استوت تكره صحارى والسبه حمدان
ويوم ردت حصلت مرت ابوها .. ومرت ابوها اول مرة تشوفها بالشيله والعباه
شيخه : اووه زين زين اطورت العزبه منو شترى لج العباه والشيله
فواغي : ابويه
شيخه : جذاابه
فواغي : انتي
شيخه : بعد قمتي تردين اشوفج مب لبستي عباه ووشيله يعني كبرتي
فواغي : في شي ثاني
شيخه انقهرت : الله يلعنج من بنت حشى مب لسان عليج
فواغي : انا تحملتج وايد دوم تلعنين انا ماسويت شي تلعنيني زين
شيخه : يااله زغت تعالي اضربيني
فواغي كملت دربها يودتها من ايدها وتعطيها كف على ويهها
شيخه : لانج قليلة ادب
فواغي طالعتها بنظره خاااايسه من فوق لتحت وركضت على الدري ودشت قسمها قفلت الباب وتساندت على الباب ويلست تصيح تصيح " وينج امايه .. لو كنتي موجوده جان محد مد ايده عليه امايه .. اباج دقيقه وحده محتاجه لج ولحنانج ها العالم كله ضدي امايه واحد يهددني ويطنز عليه وهاي تلعني وتضربني امايه انا عايشه في جحيم كل الناس ضدي وينج انتي ماتسالين عن بنتج حيه ولا ميته .. بعدين استغفرت ربها وسارت تصلي العشا ويلست تقرا قرآن هدت نفسها شوي وطاحت على الشبريه
دقت لابوها وقالتله انها وصلت البيت وقالت تبا رقم بيت عمها اللي في العين عطاها اياه
دقت محد شله ..
يايه بتبند شله خالد
فواغي : الووو
خالد : مرحب
فواغي : مهره موجوده
خالد : منو اقولها
فواغي : قولها فواغي
خالد استانس وتنهد من خاطره توله عليها وهي سبب ضرابته ويا ربعه ودخوله المستشفى
فواغي : انته خالد صح ؟
خالد : زين يوم عرفتيني
فواغي : ههههههه شحالك خالد ؟
خالد : بخير يسرج الحال انتي شحالج
فواغي : الحمدلله تمام
خالد : وينج انتي قطعتينا ؟
فواغي تذكرت مرت ابوها وحمدان : ااااااااه موجوده في الدنيا
ويرن موبايل خالد .. وتذكرت ربيعته اللي مهره عرفته عليها من الجات
فواغي : رد ع الموبايل يمكن روضه اللي تعرفها من الجات
خالد : هب هب هب من وين تعرفينها
فواغي : اعرفها من مصادر خاصه
خالد : لا والله ها ولد عمي
فواغي اوكي ازقر لي مهاري تولهت عليها
خالد : دقايق غناتي
فواغي استغربت من ها الكلمه وطوفتها له
مهره : الووو
فواغي : هلا والله بمهاري
مهره زاعقت : فوووووووووووووغوووووووه وينج تولهت عليج فديتج
فواغي : مهاري والله انا اكثر
مهره : وينج لاتدقين ولاتسالين قطعتي
فواغي : عايشه في ها الدنيا
مهره : وين مرت ابوج
فواغي تذكرت الطراق وحطت ايدها على خدها ..
مهره : حوو وينج
فواغي مووجوده
مهره : لا فيج شي
فواغي : لا مافيني شي
مهره : احلفي
فواغي بدت تصيح ..
مهره : بلاج فواغي ؟ فوغووه بلاج شو فيج ردي فويغ فوغتي
فواغي اول مرة تصيح جدام حد غير ابوها
فواغي : انا عايشه في عذاااب مهاري والله محتايه لحد ويايه بس تعبت تعبت من اللي انا فيه انا بروحي طول الوقت بروحي عايشه في ظلم من هاي شويخ ( وتمسح دموعها )
مهره : فديتج فوغوه بعدها مايابته امه الي تنزل دموعج عشانه
فواغي : مهاري ابا ايي عندكم عادي بس يومين بس وافتك من بيتنا
مهره : حياج الغاليه البيت بيتج متى ماتبين تين لا تشاورين امره هاتي اغراضج وفريهن عندنا
فواغي : اوكي بقول لابويه واذا وافق بيي واذا ماوافق بتم عند ام النار
مهره : انتي قولي لابوج وااذا ماوافق بخلي ابويه يرمسه
فواغي : اوكي خلاص اتفقنا
مهره : خلاص الغاليه تحملي على روحج
فواغي : وانتي بعد ..
مهره : فوداعت الله
فواغي : فوداعة الكريم
وبندت مهره عن فواغي وهيه تحس انها ظلمت فواغي في البداية وياها خالد وهو معصب
خالد : انتي ليش تقولين لها عن رويض
مهره : عادي مب انته تحبها
خالد : بس اللي ماتعرفينه اني نهيت علاقتي وياها
مهره : افااااا خلودي ليش
خالد: بس قلبي مايباها .. قلبي يبا غيرها
مهره : ياحليلها تعيسة الحظ الثانيه
خالد : والله انها تتمنى خالد
مهره : وانا اشهد بس منو هيه
خالد: في يوم من الايام بتعرفينها .. شو كانت تقول لج فوغوه توه
مهره : تبا تي تبات عندنا
خالد : يــــــــــــــــــس .. بس متى ؟
مهره : باجر يمكن
خالد : حلووووووووو
وظهر على طوووووووول وهوه مطرطر من الوناسه .. لكن ماسرع ها الوناسه اختفت من اتذكر تعليقات الاولاد عليها وخاف انه الموقف يتكرر لانه مايتحمل حد يطنز عليها ويعلق او يعجب فيها
وسارت مهره وقالت لخواتها ..
هند : يالله فديتها والله انها متعذبه
موزه : هيه والله .. احم احم صح فويغي ماتعرف عن عرسي اللي عقب اسبووع
مهره : اوووه صح والله اني نسيت اقولها
هند : هي من وين كانت داقه
مهره : من رقم بيت
موزه : ماعندها موبايل صح
مهره : بس لو تبا بتظهر لها في يوم وليلة
ويلسو يسولفون ..
فواغي اقنعت ابوها لكن اابوها مايعرف سبب سيرة فواغي المفاجاه .. مايعرف انه فواغي انضربت لانه لو عرف عادي يطلق شيخه لانه مايرضى على فواغي فواغي شيخة البنات وعقب اصرار منها وافق وباليوم الثاني سارت ,,

((العيـــــن ..د ار الزين ))
حدرت فواغي الحوي وشافت خالد ظاهر لكنه ماعرفها زقرته
فواغي بصوت حنون : خالد
خالد ماعرف منو هاي :ا مريني الشيخه
فواغي عقت الغشوه : شحالك ؟
خالد ابتسم وفرح من خاطره فرح صدق صدق
خالد : فديتج فوغوه تحجبتي مبروووك والله احلى والله كبرتي في عيني
فواغي : ههههههههههه عن الخبال وين مهاااري
خالد : افا لاعت جبدج مني
فواغي :لا مب عن جي بس وين مهاري
خالد : تفضلي داخل حياج
حدرت فواغي داخل شافت مرت عمها ( عايشه )
عايشه اتسانست واااايد من شافت فواغي بالعباه وحظنتها حتى عيونها دمعت لانها تذكرت المرحوومه
عايشه : هلا والله ببنتي .. هلا ببنت الغاليه هلا
فواغي : هلا خالوتي شحالج ربج الا بخير
عايشه : بخير بشوفتج الغاليه
ونزلت مهره وحاطه ايدها على خصر ها
مهره : انا اغار انا اغار خذتي حب امايه كله
خالد :يحق لها
ام هزاع خزته بنظرة لانه عيب عليه يتم يرمس جي منقووووووود عند العرب .. والعيم .. والبلوش >>> محد يزعل سواالف بس لا اكثر ولا اقل
ونزلت موزه وهند .. وطبعا رحبو بها ونزل هزاع اللي استانس على فواغي لانها سوالف
هزاع : اوووووووب الدبه عندنا ياحيها والله
فواغي : ههههههههه طالعه عليك
هزاع :: لي الشرف والله بنت عبدالله طالعه علي
عايشه :عن اذنكم بطالع الغدا جهز ولا لا
موزه : فواغي اللي ماتعرفينه .. (ويحمرن خدودها ) انه عرسي عقب ست ايام
فواغي : افااااااااا يالخاينه تخونون فيني وانا مادري اللحين وين بلحق افصل
مهره : عادي اشتري جاهز
هند : هي عندنا في العين مول محلا ت حلوه
مهره : بنتفق يوم نسير كلنا نحن وبنات عموه شمسه وبنات عمي سلطان
فواغي : انا ماعرف حد منهم انا الا من شهر اعرفكم
مهره : عادي بنعرفج عليهم كلهم طيبات وحبوبات شراتنا يعني
خالد : هي وعاد حطن اصباغ ناشيونال على ويوهكم
هند : عاااااادي حلاتنا
فواغي : موزة منو بياخذج
موزه : ولد عمي سلطان اسمه حميد
فواغي : ماعرفه هم في العين
موزه : لا في دبي
فواغي : اووووووووووووه زين قريب من عندنا .. وعيال عمي في دبي وماعرفهم عندهم بنات ؟
هند : لا بس بنت وحده اسمها اليازيه
مهره : يزوووووي
فواغي : كم عمرها ؟
مهره : كبري
فواغي : زين والله
خالد : والاولاد واحد كبري وواحد كبر هندوه وواحد صف اول اعدادي
فواغي : وانا ماعرف حد
موزه : وبنات عموه شمسه وحده كبري ووحده اكبر عنا معرسه وحده اكبر عن هندوه بسنه والاولاد واحد كبر خلودي وواحد صف اول اعدادي
فواغي : ابغي اشوفهم ماتوقع انهم يعروفني
موزه : يعرفونج لكن ماجد شافوج يعني نفس حالتنا حتى اسمج مايعرفونه
فواغي : اها
وبعدين سارو يتغدون *
عقب الغدا يلسو سوالف لين العصر والعصر دشو النت وفواغي فتحت لها ايميل وقامت تتعلم شوي شوي على النت
وباليوم الثاني قالو انهم يبون يسيرون يشتورن فستان لفواغي وفواغي قالت بتم عندهم اسبوع لين العرس مايخلص وابوها ماطاع وعقب حفله واقناع وافق
واليوم الثاني في العين مول كلهم سارو وداهم هزاع لكن خالد ماسار قال بيسير ويا ربعه السينما
فواغي اشترت فستان لونه خمري حلو طبعا ذوق هند لانها هند ماشالله عليها ذوويقه وتعيبها ها السوالف وكانت موزة كل يوم تسير الصالون دوام عندها
...................................
قبل العرس بيوم ..
يتهم الحنايه عقب صلاة الظهر اول شي تحنو البنات بعدين موزة عشان اونها العروس ..
فواغي : انا تصدقون اول مرة اتحنا
مهره : ههههههه بنشوف كيف بيطلع عليج
فواغي تحنت وطالع الحنا مالها حلو ورقيق وخاصه انه ايدها بيضا
فواغي : هند اخ يحرق شو اسوي
هند : هههههه تحملي غناتي
مهره : عاادي هانت عشان ها الويه السموح ( تقصد موزه )
وتحنو وخلصو .. حتى موزه وهند وفواغي ومهره
سارت مهره تدق ليزوووي
مهره : هلا والله باليازي
اليازيه : هلا والله وينج يالقاطعه ؟ شحالج ؟ شخبارج تولهت عليييييج
مهره : حتى انا والله فديتج يزووي انتي شحالج شخبارج شو مسويه
اليازيه : نشقح
مهره : يله شدي حيلج باجر عرس مويز
اليازيه : باجر من الصبح تجهزوو تراني من الفير بكون عندكم
مهره : حيــــــاج بس تعالي عند فوغوه طفري بها هاي عادي عندها ماتتنرفز والله باردة انتي بروحج تنقهرين
اليازيه : والله خاطري اشوفها عطيني برمسها
مهره : اوكي دقايق
مهره تزقر فواغي : فوغووووه فويغ فوغتي
ويتها فواغي ..
مهره : حشى اسمج مايدلع
فواغي :ههههههههه سبيشل
مهره : دوج وحده تبا ترمسج
فواغي : منووووو ؟؟!!
مهره : انتي يودي
وشلت فواغي السماعه ..
فواغي : الووو
اليازية : هلا مرحبا ببنت العم
فواغي : عرفت انها حد من بنات عمها ولا عمتها لكن ماتعرف منو ..
فواغي : منو ؟
اليازية : اليازية
فواغي : هلا والله اليازي شحالج ؟ عساج بخير
اليازيه : بخير يعلج الخير انتي شحالج ربج الا بخير
فواغي : بخير الحمدلله
اليازيه : شو مستانسه
فواغي : والله واايد وبالذات باجر لانه بشوفكم وبيكون عرس مويز
اليازيه : على خير ان شا الله اشوفج باجر امايه تزقرني
فواغي : خلاص عيل الغاليه بخليج واشوفج باجر ان شا الله
اليازيه : تحملي على روحج غناتي
فواغي : وانتي بعد
اليازيه : من عيوني
فواغي : تسلمين
اليازيه : يسلم غاليج .. فوادعة الله
فواغي : فوداعة الرحمن
وبندت عنها فواغي ..
مهره : ها شو اليازي
فواغي : والله شكلها بنت طيبه وحبوبه جي شراتج
مهره : لا لا احرجتيني
ودش خالد عليهم .. فواغي ماكانت لابسه الشيله ولبستها على طول ..
خالد : ازيكوووو عاملين ايييييه
فواغي : تماااام
مهره : كويسييين بدون رووضه
خالد : ايها انتي وياها روووضه ورووضه خلاص بوووي .. الرويضي مايبااها قلبي عافها وحب غيرها
مهره : هب هب هب مب قلب فندق
فواغي : لا لا درررب
خالد : طالع والله انا مصخره في حلوجكم وانتي فويغ وياها ماعليه يالخاينه نقضت العهد اللي من بينا
فواغي : أي عهد
خالد : عهد اللي بالي بالج ( ويغمز لها )
فواغي وويها عليه أكبر علامة استفهام
مهره تدز فوغوه : ها ها هااااااااااااااا شو من بينج وبين خلوودي ليكووووون هاذي هي اللي تقصدها .. اه يافوغووه ياخاينه وانا اخر من يعلم ها كله يستوي وانا ماعرف ماعليه زعلت انا زعلت
فواغي : مهااري فديتج والله ماعرف شي
مهره : هييييييييه امرررره اخرط على اللي ماتعرفه واللي تعرفه زييييده من ها الدبس والعسل والسح البايت اللي عندج
خالد : ههههههههههههههه مهاري عرفتي منو اللي انا اللحين اباها بدال رويضي
مهره : والله صدق خلوود والله عرفت تختار موووفق
فواغي اللي كانت مب عارفه شو السالفه نشت عنهم ..
خالد : بلاها ؟ازقريها
مهره : ماعليه هاي ماتزعل بس شوويه حركاات
خالد : دخيلج مهاري قولي لها حراام خلها تحس فيني خلها تحس بالنار الي في يووفي
مهره بنذاله : بفكر
ونشت عنه بتسير داخل الحجرة ......
خالد في خاطره " شو ها الحب المذلـــــــه "
ويلسو يسولفون عن العرس وعلى اذان المغرب يابو فساتين قوم مهره وهند
وييلسو يقاسيون
وسارت مهره وفواغي حجرة مهره
مهره : فواغي
فوايغ : لبيه
مهره : لبيتي حايه .. انتي تحبين حد
فواغي بضحكة استهزاء : هــه مابغيتي الا انا ولا افكر انا ماحب ها السوالف وظروفي اللي انا اعيش فيها ماتسمح لي
مهره : بس الحب يوم ايي مايستأذن
فواغي : ادري قليل ادب يدش على طول مايعرف اداب الاستذان
مهره : لا ماعليج مايدش من الباب يدخل من دريشه المكيف
فواغي : يابخت اللي يالس في قلبج دام فيه مكيف
مهره : لا قلبي فيه حناااااااان
فواغي : ياويلي انا ماستحمل انتي تحبين حد ؟
مهره : هيه .. بس مابتشوفينه اللحين بتشوفينه ثاني يوم العيد في الذيد .. عند هلنا هناك
فواغي : بعددد
مهره : ههههههههه ياحليلج ماتعرفينهم
فواغي : ماعرف حد
مهره : هم يعرفونج لكن ماشافوج
فواغي : الله كريم
مهره : نسيتيني موضوعنا
فواغي : شوو ؟
مهره : خلووودي
فواغي : بلاه ؟
مهره : لاتستعبيطين خلوودي يحبج
فواغي ماستغربت عادي عندها : ممممم وروضه
مهره : هدها عشان ها العيون اللي يذبحني
فواغي : مهاري لاتقردنين
مهره : انا ماعرف التقردين الا من يوم شفتج يالحلوه عطيني من جمالج
فواغي : انتي بروحج ماشالله عليج حلووه
مهره : زين ترفعين من معنوياتي قبل العرس خيلنا نسير عند موزه المحتفله
فواغي : يلا سرينا
وسارو عندهم وحطو اغاني وطولو وانهم يسولفن ويجهز ويا موزه ..........
وفليل ......
موزه : هندووووووووه
هند : عيونها
موزه : بتوله عليييييج
مهاري : واااااااناااااا واناااااا
موزه : وانتي بعد .. وحتى فوغتي اللي ماعرفتها الا من فتره لكنها تدخل القلب بسرعه
ودمعت موزه ,,
دشت ام هزاع .. ومن شافت موزه امها صاحت
ام هزاع تهدي بنتها اللي في حضنها
ام هزاع مول ماتعرف تهدي : اخ عليج تصيحين شرات اليهال يلا مويز الغاليه نشي .... لاحووووووول هاي شو بيسكتها هاي يوم بتصيح باجر محد يزقرني
موزه ضحكت على امها : افاا امايه
ام هزاع : عيل جي حد يصيح جي امف علييييييييج
هند : ماعليج اونها عاد باجر بتعرس
ام هزاع : سكتي انتي بنيوزج عقبها هي ماعندنا بنات يتمن بليا ريل

هند : عذرا امي المصون بعرس عقب ماخلص دراسه
ام هزاع : يلا كلي خراج شو دراسه تراه محد بينفعج غير ريلج
كلهم فطسو من الضحك على كلمه كلي خراج
ودش خالد عليهم ..
خالد : هااا امايه يوم نحن نقول تحرجين ويوم انتي تقولين عاادي
ام هزاع : لا انا حرمه وانتو يهال عيب عليكم
خالد : خلي عنج خلي عنج .. ماشي فرق تراها كلمه عيب عيب
هند : احسن قولها عيل زين جي ويهي عورني
خالد : كيف ويهج يعورج
هند : بس جب
ودش هزاع .
هزاع : اس اس السلام عليكم
كلهم : وعليكم السلام
هزاع : ها ام هزاع اشوفهم كلهم عليج
ام هزاع : هيه مافيهم خير ها العيال
هزاع : وانا ماماه ( يدلع )
ام هزاع : امف عليييييك شو ها بعد عيب جنك مب ريال طول وعرض
هزاع : افااااااا امايه افاااااا انا هزاع نزر عينش (اونه نظر عينج يقلد يارتهم المصريه )
ام هزاع : انا بسير اتسنن ابرك لي
هزاع : الله ويااااش
ويوم ظهرت كلهم ضحكو مره وحده ففواغي دمعت من كثر ماتضحك من زمان ماضحكت مثل ها المره وتذكرت ربيعتها ميره اللي كانت انيس وحدتها وقالت تبا تدقلها
فواغي : مهاري
مهره : عونج
فواغي : عانج الرب ولا هانج .. ابا التيلفون بدق لربيعتي
مهره : دقايق
ويابت لها التيلفون وسارت ترمس
رن رن ومحد شله وبعدين شلته
ميره : الوو
فواغي : هلا ميووره
ميره : اوووه القاطعه هلا لاتدقين ولا تسالين تشوفين ربيعتج حيه ولا ميته
فواغي : شو اسوي
ميره: ولا العين خذتج عنا
فواغي : لا محد ياخذني عنج
ميره : وااضح
فواغي : انزين انتي شو اخبارج
ميهر: ماشي اخبار .. صح تذكرت حمدان خلا لج ايميله يعني لو تبين تضيفينه ولا شي
فواغي تكره نفسها لو سمعت طاريه : ماااااااااالت انا اضيف ها الاشكال والله ثم والله يهبي
ميره : بللل بلاج جي عصبتي جنج ماكله فلفل لو تبين ضيفيه ولو ماتبين خلااص مافيها شي
فواغي غيرت الموضووع ويلست تسولف وياها وبعدين بندت عنها وسارت الحجرة وشافتهم كلهم يتهياون للنوم .......
وكلهم رقدووو ......







التوقيع :
اضغط على الصورة لفتحها بصفحة مستقلة

قديم 17-02-2009, 02:04 PM   رقم المشاركة : 5
^اسـيرة*الشوق^
( ود فعّال )
 
الصورة الرمزية ^اسـيرة*الشوق^
 






^اسـيرة*الشوق^ غير متصل

** اليوم الثاني يوم عرس مووزه ***
موزه من الساعه ست ناشه اصلا ماياها النوم تمت تجلب بس
وع الساعه تسع البنات نشن وع الساعه عشر وصلو هل دبي
دشت ام حميد ,,
واليازيه ..
سلمت عليهم وخذت فواغي في حظنها ويلست تصيح من شافتها اليازيه تعجبت من جمالهاااااا .. ملاااااااك على قولتها .. وعقب نص ساعه وصلو هل بوظبي
دشت (شمسه ) عمتهم وبنتها سلامه اللي كبر موزه وريم اكبر عن هند بسنه سلمت عليهم ونفس الحاله عمتها فتحت مناحه من زمان ماشافتها وكلهم استغربو منها حلووه حلااه
سلامه : عيني عليج باردة فواغي والله حلووه ماشالله ماشالله عن احسدها
ريم : فواغي اقري على عمرج عينها حاره
فواغي :ههههههههههه حرام عليج كله ولا سلامه
ريم : افا فويغ افااااااا وانا اللي ادافع عنج
سلامه : موتي قهرررر
فواغي : ههههههههه
ريم : فالحه تضحك
سلامه : فالحه ولا ناجحه
اليازيه : لا صالحه
مهره : دخيييييييلج لا في وحده معجبه فيني بها الاسم
هند : حلللللللووووووو وانا ماعرفها حوليها وبي بقردنها
سلامه : فالحات
ريم : ناجحااات
هند : كم نسبتكم
مهره : سخيفه
وييلسو يسولفون ........ وعقب شوي بتي اللي تعدلهم .. وبعدين وصلت بنت عمهم اللي معرسه اسمها حمده وكانت حامل وفي الشهر الرابع
*في الميلس عند الرياييل *
خالد ويا حمدان ولد عمه وعبدالله ولد عمته يالسين على ينب يسولفون وهزاع ومايد بروحهم واللي صف اول اعدادي راشد وأحمد
خالد : ايييييه براويكم بنت عمي اللي اقولك عنها فديتها والله ( ويغمض عيونه يتخيلها .. ليته يدش هناك عشان يشوفها )
حمدان : ياويلي ع العاشق اقول تهنا بها انا عندي وحده والله شيختهن
عبدالله : انا ماحب حد امايه يوم بكبر خلها تخطب لي وبعدين حرمتي بحبها ( سمعه هزاع ×)
هزاع : والله انته شيخهم
عبدالله : اعجبك انا
خالد : ها ها الخبيل هب راضي يعرس
هزاع : يالس على جبدك
مايد : لا على قلبه
راشد الصغير : لا على بنكريااسه
هزاع : هبي هباك الله انته وياه انا براويكم
احمد : رشووود قم قم نلعب كره
هزاع : ايييييه قوموا هناك نطالع صوب الخيم شو سوو
مايد : يله نشوا
ونشوا كلهم ......
يتهم اللي تعدل بدت بالبنات اول وحده اليازيه وعقبها الريم وعقبها فواغي وعقبها مهره وعقبها سلامه وعقبها هند واخر شي العروووس وبدت تشغتل بسرعه بسرعه ...... لين العصر خلصتهم وبقت العروس بعدين يت حمده
حمده : انا ابا مكياج خفيييييييف لاني تعبانه ومابحوط في العرس
فواغي كانت طالعه قمر ولا قمر 14 روووووووعه هي بدون المكياج حلوه وبالمكياج احلى والفستان الخمري طالع روعه وفيه نك ورافعه شعرها بتسريحه حلووه ومنزله خصل
وتلبسن وجي ع الساعه سبع نزلن العيايز الخيمه ويعابلن هناك وع الساعه ثمان ونص بدت الخيمه تمتزر بالنااس
ويلست موزه تصوور ويا المصوره وموزه كانت طالعه حلوووووووه واايد وكانت ناعمه
اما مهره شعرها قصير لين جتفها لونه بني فاتح فيه خصلات شقر ولون فستانها تركواااااز وحاطه ميكب نفس لون الفستان وطالعه حلوه
والريم كان فستانها لونه أحمر بدويه ومكياجها كان خفيف وكانت فاله شعرها الطويل اللي لين فوق ركبها بشووي طبعا امها ماتدري لانها سارت وماشافتها
سلامه : كان لون فستانها ذهبي وفيه حركه من تحت الريل طالعه ومسويه تسريحه وهند كانت لابسه وردي فااااتح وفيه بيج تنورة وقميص وشعرها اسودد ماسوت له الا فير من تحت وحتى هند شعرها بني ومسويه حركة بقصتها
اليازيه كان لون فستانها عنابي فلت شعرها وخلتها تسوي لها طريقه حلوه من ورا وحطت وردة طبيعيه في شعرها
وبعدين يا هزاع وشلهن وداهن الخيمه ومسوين حجرة صغيره حق العروس نزلت موزه داخل وبعدهم مابيطلعونها اللحين
فواغي : مهاااري ابا اييب الكيمرا مال حمده تعالي ويايه هي قالت لي
مهره : عادي فويغ سيري بروحج بسرعه وتعالي غناتي ماروم اسير وياج لبسي شيلتج وعادي
فواغي : اوكي خلااص بسير
مهره : لاتزعلين مني فويغ
فواغي : لا عادي انا ادري انتي بروحج مشغوله
مهره : خلاص عيل حياتي
وسارت فواغي البيت ركبت فوق دشت حجرة موزه فسخت عباتهاا وشيلتها ويلست تطالع عمرها اونها وطلعت الكيمرا وبعدين لبست العباه وخلت الشيله على جتفها وهي طالعه بتسك الباب وكان باب حجرة خالد مجابل حجرة موزه وواحد طلع من الباب وهوه بعد بيسك الباب وهوه عاطنها ظهره وهي عاطتنه ظهرها ويوم صدووو تفااااااااجااااات ....... مستحيييييييل

::

ياترى منو بيكون اللي جافته فواغي؟؟؟؟؟

و الباقي ف الجزء الثالث







التوقيع :
اضغط على الصورة لفتحها بصفحة مستقلة

قديم 17-02-2009, 11:08 PM   رقم المشاركة : 6
ضحكـــ^ـــ^ـــة قمر
( ود متميز )
 
الصورة الرمزية ضحكـــ^ـــ^ـــة قمر
 







ضحكـــ^ـــ^ـــة قمر غير متصل

مشكوووووورررره اسيره

الله يعطيك العااافيه
وننتظر الجزء الثاالث بفاارغ الصبر







التوقيع :
اضغط على الصورة لفتحها بصفحة مستقلة

قديم 18-02-2009, 03:10 AM   رقم المشاركة : 7
الجذااابة
( وِد ماسي )
 
الصورة الرمزية الجذااابة


انا اقول حمدان

بنتظار التكملة يالغلا :)






قديم 18-02-2009, 05:48 AM   رقم المشاركة : 8
مُذهله ♥ ~
( وِد ماسي )

رووووووووووووعه ... من جد روووووعه
تسلمييييين يالغلا وربي عجبتني الروايه حيل
واللي عجبني أكثر حكيكم يا أهل الأمارات واااي يجنن

__

أنا زي كلام جذووو أكيد اللزقــه حمدانوه

موفقه حبيبتي







قديم 18-02-2009, 11:16 AM   رقم المشاركة : 9
دمعةغروب
( ود جديد )
 





دمعةغروب غير متصل

مشكورة حبيبتي ع الابداع

روايتك مره حلوة






قديم 18-02-2009, 01:53 PM   رقم المشاركة : 10
^اسـيرة*الشوق^
( ود فعّال )
 
الصورة الرمزية ^اسـيرة*الشوق^
 






^اسـيرة*الشوق^ غير متصل

شـــــــــــــكراا عالمروور الكل







التوقيع :
اضغط على الصورة لفتحها بصفحة مستقلة

موضوع مغلق

مواقع النشر (المفضلة)
   


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع تقييم هذا الموضوع
تقييم هذا الموضوع:

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 06:35 PM.




 


    مجمموعة ترايدنت العربية