اتواصل معكم... بهذا البوح المتواضع... من احساس صادق.. ومشاعر كتبتها دما بدم... اهديها مغلفة بالحب.. وعبير الرياحين... وعبق الياسمين.. الى
زينة أبيـــــــــــــــــــــاتي
يا زينة ابياتي تعالي... انتي لي ذخر وزهاب= وانتي اغلى امنياتي.. كلي من كلي فداك
يا عذابي من عذابك ... لا غدى قربي عذاب = وياوجودي يوم قلبي ... ارتحل عني وجاك
اذكر اني قبل اشوفك ... ماعرفت الارتياب = لين ساقك لي نصيبي...وانشغل فكري معاك
يا عبيرالورد قولي ...من هو اللي ما يهاب= وانتي اللي من عيونك... انطلق سهم الهلاك
يااتفاق بلاتضاد ... يايقين اضحى سراب=يا اساطير الخرافه...يالغز من هو هواك
ياخصايل شعرك اللي...في نعومتها يذاب=يومها انفاسك غشتني...ماعشق قلبي سواك
عجلي همي طغابي...واسمحي لي بانسكاب=لملميني في عيونك ...واسكنيني في ذراك
واحبسيني في خفوقك...لو نهبتيني نهاب !!=واجمعيني من شتاتي...وانثريني في سماك
واقسميني لو بغيتي ...يا خبيره بالحساب=من تناظر في تكامل...وحده الناتج غلاك
يا هنيال المرايا... تعكس الزين العجاب = ويابخت ذيك الاساور... يوم زانتها يداك
والخواتم وش حلاها ...ضمت غضاض ٍ رطاب=استقرت في كفوفك... واستثارت في بهاك
استخالت في يدينك...من ورودٍ في ذهاب= لا تقولي وش دهاني...انتي اللي وش دهاك؟
ايه با اوصف حسنك اللي... في هطوله كالسحاب= ايه اطوع قافي اللي... استمده من سناك
يا لطافه في نعومه .... يا صراحه باهتذاب= يا براءات الطفوله... يا نهاية من بداك
انتي حتى لو خطيتي... في جراهيدٍ جداب= تزهر ورود الخزامى...تنتظر لمسة خطاك
يا زينة ابياتي تعالي... انتي لي ذخر وزهاب= وانتي اغلى امنياتي... كلي من كلي فداك
يا عذابي من عذابك... لا غدى قربي عذاب= ويا وجودي لو قصيدي... ما وفى غاية رضاك
مقبل بن خلف الهذيل السرحاني
العرض الشجري
