أنا البارحة لجّت علي من هنـا وهنـاك
هواجيس لا عـادت ولا اللـي مسببهـا
واريّح على الكرسي واوقّف على الشبـاك
أشاهـد انجـوم الليـل سمّـار وارقبهـا
واسولف على روحي واعمّر من التنبـاك
وبعض الزقاير والعه دون مـا اشربهـا
ولا من زهقت التتـن بدلـت بالمسـواك
واعـد الدقايـق طـول ليلـي واحسّبهـا
أيا مخبر العاشق عن الورق فوق الـراك
وعى الدرس واستاثـق امـورٍ مكذبهـا
وألا يا دقيق القد كـل الحكـي ينصـاك
اصدودك وهجرانك معي ويش موجبها؟!!
عليك الملامه من جبينـك إلـى ماطـاك
قلـوب البشـر ماهـي بلعبـه وتلعبهـا
بعد قلت لك خذ قلبي وهاك..وهاك..وهاك
تخيّر باحاسيسـي ولـك منـي اعذبهـا
تجرّى بما سويت يـوم اللعيـن اغـواك
وكل الحقايق واضحـه كيـف تقلبهـا؟!!
متى جيت لك منّا تخـارج معـي منـاك
واذا جيـت لـك مناك..منـا تشقلبـهـا
لك بكل يومٍ حال ماجـور مـن ربـاك
أظنـه تعـب يقـرا اشفوفـك ويكتبهـا
علاقه سقيمـه لا هنتنـي ولا تهنـاك!!
أنـا كـل مـا ابنيهـا تعـود تخربهـا
ولايستوي تقديم عجفـاك مـعْ سمحـاك
ومـن كـرّم اللحيـه يكـرم شواربهـا
بعد حانت فصول النهايه وعلمـي جـاك
بقى كلمتين اسمع لهـا زيـن واقضبهـا
كبيره على مثلي يقـدر مثـل شـرواك
عليك البرا مـردود كلمـه وابـرّ إبهـا
ولك الحق تزعل..لكن افداك من راضاك
جهلنـا . تعلمنـا . تعـلـم وجربـهـا
يقول المثل من صد عنك عطـه علبـاك
إلينـه يميـز خايـب النـاس واطيبهـا
العرض العادي
