يوم من الايام و بعد ما كنت قد بلغت سن ال16 عشره سنه
وصرت حرمه وش ملحي
ايه صح السلام عليكم ( بدري)
نعود لموضوعنا
يوم جاي عمري 16 عشر سنه ( موب كني مبسوطه اني وصلت 16 اكيد لازم انبسط لان الي مثلي حدهم الى 12 سنه وينقرضون )
وطبعا انا من زمان وانا مشفوحه وابي اعرس وابي يصير لي بيت بروحي احوس فيه على كيفي و اجيب لي بزران عشان اكفخهم ( تحسوني من جد معقده بس مو مني من التكفيخ الي جاني وجهي صار كنه خبزة تميس) (بزران = اولاد)
وش اسوي انا في البيت اخواني كلهم عيال ويعدوني ولد مثلهم حتى اني البس صرواليهم السنه يقولون اني ما افرق عن خششهم الا اني ماعندي شنب بس يقولون انتي اذا اعرستي تدفعين نص المهر لانك ستاندر وزواجه منك هو تبرع منه لي انقاذ البشريه)
ويجي هذاك اليوم وقالت امي ترى المسكين بيجي اليوم بيشوفك الله يستر ( ميب مصدقه انها راح تتأهل لدور النهائي)
وروح لغريفتي واقعد اتكشخ ومشط في ذا الشوشه الي كأنها الزرع الي في البر الي يصير عنده جحور الجرابيع (كلي تبن ولا يكثر) واجيب هذاك الديرم الي اذا حطيتها في براطمي تقول كني ما كله كبده نيه بعدين رحت ادور لي الكحل ولا لقيت واخذ لي فحمه واشخبط فيها على وجهي حتى اني كتبت مع تحيات ام سندر اسيرة المنفوحه
و تجي عندي امي عشان تتفقد الوضع وهي الي تويق ( تويق= تطل = تناظر ) علي من باب
وتطلع عيونها
امي : هو هو هو هو (علامة استغراب وتفهيه)لعن ابو دارك وش مسويه بروحك؟؟؟
انا : وش رايك فيني ماني اهبل كني رباب ايام الشباب
امي : اقول هذي الي تبي تطير الرجال عللينا يا الخبله حنا يالله لقينا واحد يرضى فيكي انتي و ذا الشوشه الي كنها حبشيه شايله بسطتها وبعدين وش ذا الريحه المخيسه؟؟؟؟(المخيسه = الشينه)
انا : وقسم بالله ما سويت شي
امي: انتي تسبحتي؟؟(التسبح = اخذتي دش = استحميتي)
انا : ايه سابحه قبل شهرين يوم نروح لعرس ام دحيم
امي: يالله انك تغربلها يالله قدامي للحمام يالله
وتوديني امي للحمام والله يا طلعت كائنات غريبه
كل شوي اشوف شي يطيح والباقين متعلقين ويصايحون له وهو يقول انتبهي للعيال يا قميله
<---- ضاق صدرها حرام افرقهم عن بعض وانا الي اخذه وارجعه في مكانه قلت ياله عيشوا مع بعض وهم يقولون لي الله يرحم والديك ما قصرتي
حتى اني يوم جيت البس هدومي طلعت وسيعه علي كلها كانت شوائب
وتلبسني امي وتحط لي جدايل لزوم الرزه وهاك القميص الاخضر الي منقط ببردقاني ( يلعن ام الذوق بعد) وتفرق هالشعيرات وتحط زيت زيتون حتى صارت لمعته تقول كني تروشت بفيري
وتطيبني بهاك الطيب الي كنه قاوروة ميرندا بالجراوه ( ميرندا سبشل) كنه هذاك الطيب الي مع درب درب ذاك القزم الي يرش فيه ( ميب عجوز ابد)
وريحته كنها ريحت هنود في عيد الفطر
والله وهي الي تقول لي يالله قدامي اشوف روحي عشان تدخلين على زوجك ( والله يا امي مستعجله من جد تبي الفكه مني الرجال ما بعد خطب وتقول زوجك) وانزل وانا اتمخطر في المشيه قالكم اتدرب على حركات التميلح ومير اتكرفس(اتكرفس= اتعثر) من الدرج واتعلق بجدايل اميمتي وهي الي تخبط وراي عادي هي مشاء الله كبري 7569375983 مره وتوطاني وصرت كني قوطي سن توب واطيته سياره وهي الي تقوم وتقول حسبي الله عليكي من بنت وتجي بتكفخني بكعب قلت لها للحظه للحظه
قالت وشو قلت لها انا متشوهه خلقه تبي تشوهيني زود والله لا اقعد على تسبدتس(تسبدتس= كبدك) ولا ياخذني فكرت هي وقالت اول مره تقولين شي صدق بس هين خليه يطلع وانا اوريكي ( والله الام بعد فاقده لشي اسمه حنان الامومه شكلها تايوان)
وانا الي اركض وتلني(التل = السحب بشده ) امي مع شوشتي و اهبد على خشتي وهي الي تمسك رجلي وانا ازحف ازحف ابي اوصل للمجلس عشان اشوفه وهي ماسكتني بيدينها ومتعلقه في الدربزين حق الدرج برجلينها
قلت لها فكيني وافك واهي بحركه سريعه تقلبني وتربض فوقي وتقول بلا خبال اهجدي دخلي معك العصير له 00 قلت لها انتي دخليه انا عروس ما اشتغل
وعلى طول بحركه خطافيه ثانيه تحط راسي تحت اباطي وتقول لي تهجدين ولا لا (عربجيه ذا الام) وشوي الا انا مغما علي لاني حاطه مزيل للعرق في الاباط ولا بعد تعودت عليه وانكتمت ( ابوكي يالمخيسه)
ويصحوني ويعطوني الطوفريه(الصحن ) الي فيها العصير وقالو لي ادخلي عليه يالله انا من اللخمه ( للخمه = الحوسه) شربت العصير وتمسكني امي وتحط راسي في المغسله وتكب علي مويه وتقول هاه صحيتي ( لا تخلونها تشوف افلام)
يا سفاب السشوار بس ( يعني استشوار للقراوى) ويعطوني عصير ثاني وانا الي امسك الطوفريه واقعد اتنافض موب من الحيا لا بس من زود الشفاحه ودي اصير ثقل بس عجزت
وادخل عليهم حتى اني داخله بالريوس قالكم اني استحي ( الا قولي ما تبينها يناحش من خشتك ) وطبعا اطفي النور واقول لهي اطلعوا كلكم وخلونا بروحنا
وهو الي يرتاع ويقول وش تبي تسوين فيني قلت له لا تخاف لا تخاف انا عندي اخوان واخاف ربي ( وش تبي هذي) قلت له وش اسمك وهو يناظر فيني وهو مرتاع ويقول اسمي علي 00 وانا اضحك قلت وش يقرب لك علي عبد الله صالح ( مسويه تبي تنعش الجو هي وخشتها)
وهو الي يبتسم ابتسامه خضراء ويقول ممكن تولعي النور ابشوف وجهك قلت ليش وش قصدك يعني انا نوري ما يزي ( يكفي) ( والله اني ذهينه واعرف اصرف) قال الا بس ابي اشوفك قلت له علي ما عندنا بنات ينشافون قبل العرس ( من حقي ابي اضمن مستقبلي والله لو يشوفني ان ينحاش ويفضحني) قال لا لازم اشوفك
بس تبون الصدق يا هو اطخم(حلو) يشبه جواد ( له حق يخاف على روحه) قلت له عندك نكته ( يلعن ام السواليف) قالي لا انتي عندك ( تحسون انه ياخذني على قد عقلي) قلت ايه 00 قال وشي؟ قلت وشي؟؟ قال النكته ؟؟ قلت وش نكتته؟؟ قال الي بتقولينها ؟؟ قلت الحمد الله بس اسكت لا حد يسمعك ( قلبت عليه)
قلت ابسئلك سؤال ؟؟
قال اسئلي عيوني
هو قال عيوني ولا ما قال وجاني مغص وحسيت اني حامل من الفرحه
قلت له انت عيوني وضروسي وخشمي واصبع رجليني بعد
ضحك وقال مرسي 00 قلت هوهوهو وش امرس وخزيااه عيب
قال لا لا تفهميني غلط انا قصدي مرسي يعني شكرا قلت ايه عز الله مقامك
قال لي انا كلي لك عيوني
<----- جاها زيران
وبعد ما قمت افحط في المجلس تقول كني قطوه محجرين(محاصرينها) لها بزران(اولاد= اطفال) في عشه جيت جهته وقلت
قلت له صدق تحبني يا علي
قال ايه حبيتك لاني احس فيك خشونه انا افتقدها قلت من ناحيت الخشونه خذ حرمه وارز(ارفع) رجلي في خشته واوريه التشققات الي في اسفل رجلي قلت تصدق اني اذا مشيت اسحب الفرشه الي تحتي من زود التشقق
قالي لي اوكي عيوني انا الحين لازم اروح
قلت له وين بدري هو دخول الحمام زي خروجه يالله
قال وشو؟؟ قلت يالله ملك علي وتزوجني لا افقع وجهك ( والله اني اعرف اقنع) ومن حضي انه طلع دلوعة امه وزلابه(خواف) يخاف قلت له يالله تزوجني الحين وانا بدفع المهر انا مجمعه في حصالتي 17 ريال ونص حقت فسحه خذها مهر
ضحك وقال طيب اليوم اجي اتزوجك
وطلع
و الحين لي 35 سنه وانا احتريه لعن ابوه سحب علي ( اصلا انا ما ابيه خكري )
وبانتظار جديدك 
العرض العادي
