من كل قلبي قلتها اليوم مابيك * ويشهد على ماقلت دمع بكيته
ليت الليالي ماتجيني بطاريك * ودي بنسيانك ولو ماقويته
وليت الحنين إللي بعيني يراعيك * اموت وأنسى اللي لنفسي جنيته
كلمتني وتقول قلبي يناديك * يشفق على شوقك وحبك رجيته
قلت الله اقوى قلبي اليوم ساليك * ولله مايرجع فؤاد رميته
يوم إن قلبي ياعشيري مصافيك * لاا ياحسايف بالخينه جزيته
يومه يبيك وساعياً لجل يرضيك * صديت عنه وفي عذابك كويته
واليوم يوم إنه قنع في تجافيك * تقول حبك ياحبيبي شريته
نسيت كل إلي جرى من تغليك * ابعد ترى اليوم بعدك رضيته
امشي لك بنية سليمه وأدآريك * وأثرك بنية شر قلبي نويته
مابيننا رجوى ولاني براجيك * هدمت قصر في غرامك بنيته
قلبي عقب موت الوفا جا يعزيك * ويغسل بدمع العين حب نسيته
وبكفنه بالورد وعهود ماضيك * ويدفن معه ذكرى حبيب كويته
العرض العادي
