مساكم فل وبردقانه وكلش << يا ويلي ياللي لابسه الاصفر << وش يبي ذا
حي الله احباني << ما يذب على احد بكلمه احباني
اتوقع ان عنوان الموضوع مبهم وماهوب واضح <<< يا روحي يا مبهم
قبل ما ابدى لكم قصتي ابي اوضح للناس اللي ما يعرفون وشي (القضوم)
القضوم / عباره عن حبوب يسفها الملجلج سفاً بفمه << مسوي توضح انت ووجهك
وهي حبوب مسهره ياخذونها سملق شرق الرياض ايام الاختبارات علشان يجيبون درجات بس بسببها يجيبون العيد
بالنسبه لقصتي واللي هي كالعاده انتهت نهايه مأساويه
بداية قصتي.. كنت معزوم بزواج واحد من اخوياي وكأي واحد معزوم رحت وسلمت عليه وباركت له على زواجه وغمزته له وقلت يا حليلك مستحي << ماهوب وضح على هالكويحه مستحي ولا فرحان ولا زعلان من سواده
وعقبها جلسنا وتقهوينا وتعشينا وعقب العشاء جيت بأسلم عليه وبأمشي بس الرجال لزم علي اني اقعد
سألته وشي السالفه ؟؟؟ قال لي فيه فعاليات عقب العشاء
قلت وشو ؟؟ فعاليات ؟؟ سحب على سياره ولا العاب ناريه << يا شين اللي متعودين على مهرجانات سوق الشعله
قال تعال اجلس وبتشوف ؟؟
وفجأه واول ما جلست طلعو علينا حوالي 30 قهوجي بيديهم صينيات وبها بيالات شاهي ووزعوها علينا
شربت اول بياله وعقبها دفوني ببياله ثانيه
وبعدها جانا ابو المعرس وقال لنا : تفضلوا برا << تحسون قمه الاذلال من ذي الطرده
طلعنا برا ولقينا الشباب فارشين الزل ومادين الطيران وانواع الفله
بدو يحمون الطيران ويجهزونها وشوي الا احس رعشه بجسمي والنشاط يدب فيني وعيوني فنجلت<<< ماخوذة من الفناجيل
التفت عن يمين ولقيت شايب بيده مشاعب متكي عليه ومنحني ظهره
رحمته ورحت له وقلت يا خال تبي اجيب لك كرسي ؟؟
قال لا بس جب لي بياله شاهي
رحت وعطيتها بياله شاهي واول ما شربها صلب طوله ورمى العكاز وقعد يهبد صدره بيدينه مسوي طرزان التفت حولي ولقيت الشيبان كلهم نفس الحاله
واطيح متصلب بالارض على شكل صليب
ايديني ممدوده وجسمي متصلب ؟؟؟ جو وشالوني وخلوني اتكي على جدار القصر طالع فيني احد الشباب وقال احلى عندنا نسخه من فيلم الالم المسيح
صحيت من طيحتي ورجعت لبيتنا عالظهر وسحبتها نومه الين اليوم الثاني الظهر وقمت مهدود حيلي
دقيت على خوينا المعرس بأعرف منه وشي السالفه ؟؟ كلمته وسألته وش بالشاهي اللي خلنا نشيطين لذي الدرجه قال لي انهم حطو بالشاهي حبوب
انا قلت ياخي عطنا منها دامها منشطه وتخلينا اقوياء ورهيبين << ما ودك تنطم
اخذت الحبوب من الرجال وكنت ناوي اسفها بالليل لا نامو الشيبان ببيتنا
وعالساعه 12 لما نامو الشيبان سفيت لي كم حبه وشوي احس بالنشاط وقمت اتلوى من النشاط !! قلت بنزل الحوش لعل وعسى اركض ولا شي ويروح النشاط
نزلت الحوش ولقيت سيارتي مغبره وحالتها حاله ومسكت معي اغسلها وجبت السطل والصابون وبديت تمسيح وتغسيل ومن زود الحماسه غسلت المكينه والشكمان والمراتب
وما حسيت بنفسي الا وانا مغسل كل مواتر اهل الحاره وكانس الشارع
وعقب هاليوم وانا ادمنت هالقضوم وصرت اسفها واحس بالنشاط يدب في اوصالي << اموت يا مفردات
ومن زود النشاط صرت اشتغل وظيفتين ... بوظيفتي الرسميه في الصباح وعقب العصر اشتغل اشيل بلك مع افغانيه <<< يقول بنفسه يا رب ما يقرى لقمه ولا الخبل المملوح ولا د.حجازي الموضوع
وعقب هالادمان صرت عربجي وراعي تفحيط ومقاومات .. وبأحد هالايام وانا في حاله من اللجلجه وقفت عند اشاره على موتري (ددسن 88) ووقف جمبي راعي فراري ولقيته يطالع فيني بنظره مشبوهه << تكفى يا روبي
نزلت الدريشه وقلت تقاوم يا الحبيب ؟؟؟ قال ايه يا الزلابه << لا تعليق من جد
فتحت باب موتري ونزلت وحطيت بتانكي البنزين 8 حباب شبح << من اقوى انواع القضوم
وقلت يالله ابن امك تسبقني << حتى موتره يقضم
ولعت الاشاره خضراء وحطيته بالاول ودعست ؟؟؟؟؟؟؟ وقمت عليه ومن زود الحماسه مسكت خط ولا حسيت بنففسي
بس اخر شي اخبره لوحه عالخط مكتوب الحدود الاردنيه
رجعت للرياض وانا حالتي حاله ومتلخبط و رحت لمستشفى الامل وعالجوني من ادماني وصرت رجال وش زيني
تسلم اخوي "واحــــــــــــــــد من النـــــــــــــــــــــــــــــــــاس"
والله الصراحه اخوي صدقت في مثل هذه الاشياء عاد يا كثرهم
خاصه بالشباب السعــــــــــــــــــــــــــــــــــــــــــــــ ــــــــوودي
يا ربي انواع الادمان والعياذ بالله ونتمنى لهم الهدايه بأذن الله
ويعطيك العافيه يا عثل على ذا الموضوع المشيق صراحه والنصيحه الحلوه
وبيني وبينك الموضوع منتــــــــــــــــــــــــــاز منتــــــــــــــــــاز بالحيل .
الللللللللللله يرجك واحد من الناس
مرة وحدة ماكرينا بسامري
بس سحبة مايكل عجبتني بقوووووة و عنف>>>>>>>ياساتر إرهابــــييييييييييي.......
تسلم عالموضوع واحد
بايات