بدايتي الضياع قصتي واقعيه

[مسكين ضاع شبابه]

بسم الله الرحمن الرحيم

قصتي الي احتفضت فيها بنفسي ولاقلتها لأي بشر كبتها بخاطري لين خلاص بديت اتفجر وقلت لازم اقولها لأي احد وزي ما تعرفون ماحد من الناس بيعطيني وجه قلت اقولها لكم تواسوني فيها وتشيلون من همي لو القليل

بدايتي انا وحيد امي وابوي (ادعو لهم بالرحمه)
عايش معهم مستانس مستور والحمد لله دخلت الأبتدائيه درست نص سنه وفي يوم من الايام اهلي راحو يحضرون زواج وقطوني عند عمي ماكنت ادري انها اخر مره اشوف فيها امي وابوي لو اني ادري ذاك الوقت كان رحت معهم ومصيري هو مصيرهم لكن هذي مشيئه الله ولانقدر نغيرها طريقة موتتهم ما اعرف عنها الا انها حادث ولاشفتهم بعدها واللحين انا ندمان على شي واحد ياليتني كنت كبير وشلت ابوي او امي في جنازتهم وادخلهم بالقبر لكن قدر الله وماشاء فعل.

عشت عند عمي وياليتني ماعشت والله ذلني والله ثم والله اني انذليت مذله ما بعدها مذله سرت اشوف عمي في الاحلام من كثر ما يطق فيني كنه يقولي ما ابيك تعيش معنا عشت معهم اربع سنوات كانت لي مثل 20 سنه عذاب وجا اليوم الي خلاص عافت نفسي من عمي ومن بيته طلعت من بيته هربت لكن وين وين وانا باقي في خامس ابتدائي ماعرف الي لي والي علي عشت مشرد ولاقدرت امد يدي للناس لين تقطع بطني من الجوع ومالي غير المذله ذليت نفسي للناس لني ماقدرت اعيش عشت ياجماعة الخير بدون دراسه بدون اهل بدون نصيحه بدون وبدون وبدون.......

تعلمت اشياء كثيره منها الدخان كبدايه معا شله كانت اعمارهم كبيره وكنت عندهم انا التسليه يطقون فيني ويحتفلون فيني المهم علموني الدخان بعدها الحشيش وبعدها نشفط غرى اذا طفرنا وبعدها الـــــــــــــسرقه سرنا نسرق ولانفكر سرت انا عندهم مفتاح كل بيت ينسرق كنت انا الي ادخل معا درايش البيوت انا الي افتح الابواب انا الي اهرب لهم كل شي علي سرت انا مفتاحهم لكل شي خلاص تحجر قلبي وحياتي معهم كانت وهم صحيح اني اكل واشرب واللبس لكن حرام ومال الحرام تعرفون شيسوي في صاحبه وصل عمري 18 وانا معاهم منضم لشلتهم من شقه الى شقه متنقلين جا اليوم الي انصادو فيه جماعتي وانا ماكنت معهم الحمد لله ماكنت معهم اخوياي ماقصروا مابلغو علي ولاقالو عني شي طلعت منها لكن احترت شسوي انا كيف اعيش بدونهم تحطمت كان اول يوم اشرب فيه شراب ذاك اليوم شربت حتى فقدت المهم امسكوني المكافحه وودوني لمستشفى الامل بعد ماطلعت من المستشفى لقيت لي جماعة الخير الي ينشد فيهم الظهر هم المطاوعه نصحوني ويودوني ويجيبوني معهم المهم رجعت للبلى الي كنت اتعاطاه والمطاوعه السند حقي بلغو فيني يوم صادوني فاقد وانمسكت للمره الثانيه دخلت في تحقيقات بسيطه وتحولت للمستشفى الي يجيب الهم طلعت من المستشفى

والله ضعت خلااااص ملامح وجهي حسيت انها بتختفي من التعاطي والقعده بالشارع فكرت يوم من الايام بشكل جدي الانتحار لكن ربك (يمهل ولا يهمل) وانفك مني وسواس الانتحار تحطمت كنت ابي اتزوج ابي اكون زيي زي الناس لكن كيف وانا ماعندي اهل كيف وانا ضايع كيف وانا ماعندي وضيفه كيف وانا ما ادرس العمر ضاع العمر ضاع لن ماحد اهتم فيني لاتقولون اني انا الي ضيعت نفسي لكن النصيحه الي معه اب وام هذا عايش والله عايش انا ودي بس ودي كان عندي اب ينصحني او يضربني او ام تسوي لي اكل تشوفني اذا مرضت تحن علي لكن مالقيت والي لاقيها يقدر النعمه الي هو فيها اهم شي في اخر الدرب جيت ابي ادور وظيفه رحت مكاتب العمل كلها ماقصروا معي حولوني على شركات لكن الشركات ماتقبلني ليه تعرفون ليه علشن ماعندي شهاده والله ياناس اني تحطمت قفلت بوجهي كل شي قفل بوجهي مادري شسوي اللحين ماعاد عندي حلول وابيكم تساعدوني ياناااااس



أخوكم: محمد

[خـيّـال نـجـد]

شوف يا محمد انت انسان مؤمن بـ الله


وان هذا الشيء مكتوب عنده سبحانه

لا تخلي اليأس يحطم حياتك كلها ... وأنا ما ألوووك على اللي سويت هذا كله

لاني لو كنت مكانك كان سويت أعظم منك


أخوي محمد ,, أنصحك أول شيء بـ الرفقه الصااالحه (( المطاوعه )) ولا تتركهم

والله وثم والله ما أحد نافعك الا هم بمشيئة الله

وحاول انك تغير من حياتك وانك ما تبقى على هذا الحال وبعدين علشان ما ترجع مثل أول .

صحيح الماضي قوي على قلبك وما ينّـسي .. لكن ابيك تفكر

كيف تبني حياتك بـ الإيام الجاايه بنفسك ..؟؟

طبعاً أول شيء تتجنب عنك الوساوس النفسيه

واهم شيء محافظتك على الصلوات في أوقاتها ..

لان الصلاة تحقق لـ العبد كل شيء ..صدقني .. مثل الوظيفه و الطموح وغيره


وحتى لو ما معاك شهادة ثانوية وما شابهها


ولا تنسى شيء مهم مهم جداً وياليت لازم انك تسويه ..اللي هو..

ألدعــــاء في الليل وفي أوقات الاستجابة و لا تستهين بها ولا تحاول تتركها

واطلب من الله ان يرحم والديك ويعوضك منهم ويعوضك من الماضي المؤلم


انت يا يخووي طلب مننا المساعده وانت عاارف ان بيدنا شيء واحد فقط

اللي هو النصيحه فـ إذا طبقت النصيحه فـستجد كل ما تريده بـ إذن الله


العذر يا خووي على التقصير

وأسال الله ان يعينك ويوفقك ونشووفك ان شاء الله بـ الف خير



أخــــوك



خــــيّال نجد

بسم الله الرحمن الرحيم

السلام عليكم ورحمة الله وبركاته

اخوي محمد الله يعطيك العافيه وطولت العمرر

انا اذكر لك ايه من القران الكريم وانت تدبر هذي الايه

قال تعال في منزل التحكيم

( ومن اعرض عن ذكري فان له معيشتا ضنكا)


اخوي محمد ارجع الى الله وتوب باذن الله انك راح تشوف السعادة الحقيقه

وراح تعرف ان الله سبحانه مع الصاابرين

واصبر ترى هذاا كله يمكن درس لك وكم من المشايخ كان حالة اخص منك
والحين الحمد الله من كباار الدعاء الا استفادو من المرحله اللي كانو فيهاا

عندك الشيخ سلطان الدغيلبي المشهور با ابو زقم الله يحفظه

واسمع شرطان دين وارجع الى رب العباد والله مافي احد راح ينفعك الا باالمشايخ

رح وتكلم عند اي شيخ باي حلقه باي مسجد كبير وشف ويش يقولك
لاتوقف قدام المرايه وتشوف نفسك لحاك
اعقد العزم واصبررر وخل صلتك بربك


وصل الصلوات المفرووض وادعي ربك وانشاء الله تكون بعدها با افضل حال


هذي نصيحتي


اتمنى من الله اني اكون وفقة با المشورهــ

اخوك ماجد التركي

[خيال الرٍوٍح]

مشكور اخوي مسكين على المشاركة المفيدة


وانا عند حدي اخوي ماجد كفى وفاء


يعطيك الف صحة وعافية

ننتظر جديدك

[مسكين ضاع شبابه]

يعطيكم ألف عافيه يا شباب على النصائح الرائعه هذي ويعلم الله اني مستانس معكم

[دامبيش]

الله يعينك
قصة مؤثرة

اخوي شف هذاا المووضوع للاخ فجر الاسلام
با القسم الاسلامي ممكن تقراهــ

فيه خيرر كثيرر


http://www.al-wed.com/vb/showthread....87#post1260487

[تركي الناصري]

اتمنى انها ما تحذف مشاركتي او تعدل لاني ابكتب رقمي للاخ محمد وصدقني يامحمد باذن الله لكون اخوك في الله وباذنه راح اطلعك من هالمشاكل وابحث معاك لوظيفة وين ما كنت ووين ما كانت ولو اعرف ياشيخ لو افقد وضعي ودراستي بس اهم شيء انت ترجع لله وتنهدي باذنه انت اتصل علي ومايصير الا خير والله لجيك وين ماكنت اخوك تركي الناصري...