للحناجر وقت والبتار له وقتٍ مغاير = والصياح اش قيمته من دون شجعان وأصايل ؟!
والخُطب لو هي حماسية وفيها دم فاير = ماترد السبي وإتذيق العدو نار الهوايل
المنابر صح تِشْبِعنا من أصناف البشاير = بس عمر المنبر الصّدّاح مايشفي غلايل
كل من يبغى يجرِّب بندقه يجيك غاير = يمَّنّا وإيخرِّع (الورعان ) في عز القوايل
في بداية غارته يجيك مثل الضيف زاير = كل يومٍ له ذريعه غير وأهداف ووسايل
مابقى في روسنا عزة ولانخوة عشاير = ولا بقى بديارنا موطى ... ولابه دم سايل
انهتمنا وانزرعنا خوف وإذلال وخساير = قال ايش الاخ ..... قال إنَّا من عيال الحمايل !!
طير ياعمِّي ولاتْزيد الوجع في جرح غاير = العيال اللي رضوا بالمسكنة ماهم صمايل
والعيال اللي على جبهاتهم تطفى السجاير = مابهم لامِر .. لاغيرة ... ولافيهم فضايل
ياملوك الأرض ياقاداتنا وين الضماير = بلغ السيل الزبى والصبر جدا صار آيل !
ياولاة الامر غيثونا .. تراه الصمت جاير = أخرجونا من سجن (نشجب ) و(نستنكر ) و( زايل )
مانشكك في نواياكم ولا صدق الضماير = لكن النية تبي منهو يترجمها فعايل
أشِّروا بس أشِّروا والله لنوقدها سعاير = مانبي نخرج عن الطاعة ولانرضى التحايل
اطلبوا منا نخوض البحر وإنهد العماير = والله إنا غير نهدمها على روس الزمايل
أنقذوا امٍّ على ورعانها سحّت عباير = قامت إتعدد أساميهم بتوصيف المثايل
ارحموا شيخٍ غطس شيبه ورا ثقل الجباير = قبل كسر الجسم ....هو مكسور خِلقه وإمتمايل
ياولاة الأمر وين جيوشنا وين الذخاير = الدفاع المشترك وينه ؟! أو إن الحال مايل ؟!
ياعروبتنا وش اللي عاد باقي من نذاير = وين أغانينا الحماسية وتقطيع الفنايل ؟!
وين ( مصر الأم ) وين( الشام ) وينك يا ( الجزاير) = وين( ثروات الخليج ) الطايلة ؟! ماني بقايل !
وين ( مراكش) وأهل ( سوسة) عن اللي اليوم صاير = وين دارك ياعمر مختار وينك يالقبايل
وين ( صنعا) تردع المحتل عن فعل الكباير = وين جيبوتي ومقديشو ولبنان الفصايل
ياترى(السودان ) عنده علم اوماالزول داير = وياترى ( الاردن) نشاماها على نفس الشمايل
يافلسطين إنتي أدرى بالألم ... فيك الدواير = إنتي أول جرح بالأمة ... وياكثر الأوايل
وياعراق احترت أنا ياعْراق والله حيل حاير = مدري أنخى هامْتَك ... وإلاّ لك أستجدي الجمايل !
الجثث ياعْراق في أرضك مثل ردم الزباير = والشوارع فيك مزروعة حزن عقب الخمايل
ياعراق جْروحنا زادت ولافينا بصاير = والعتاد اللي عطونا أيّاه من حظ الزبايل !
العرض العادي
