ولد الجفالي وولد الحاج حسين :) نزلوا عليه وهو نايم بالسطح

[زوبعة فكر]

الكذب أحياناً يكون وسيلة لجعل الدهشة حاضرة
سواء للوصول إلى غاية ما أو لتطعيم الأحاديث بكل ماهو جديد من نوعية أطلق الأرنب
أو من أجل تزييف الحقائق
أو لإصلاح أمر ما وتكون الكذبة هنا بيضاء زي ماهو متعارف عليه
والبعض أحترف الكذب وأصبح يحبك الكذبة بأسلوب يجبرك على تصديقه
بالرغم أنك تدرك أنه كاذب إلا أنك تعطيه مساحة من الدهشة والتصديق
ولكن ماهو غريب وعجيب أن تقع في كاذب يحكي تفاصيل حكاية لا يستوعبها خيال طفل
ويصر على أنه صادق
وبمعنى آخر إذا كذبته كنت عدوه هو مريض بتأكيد بالكذب المفضوح
يعني يكذب ويصدق كذبته
وهذا مثال من أرض الواقع لكذاب تجاوز حدود المنطق :
المكان : الاستراحة .
الزمن : الساعة الواحدة صباحاً .
عدد المستعين : قد يتجاوز الثالثة عشر نفس .
محور النقاش : حكايات غريبة .
المتحدث : إنسان من مظهره ومنطقه تصدقه .
الحكاية كما هي بالعامي سأطرحها :
يقول أنه دايم يحب ينام في السطح لأنه يقوم كل صباح نشيط يقول في يوم ماقدرت أنام أعد النجوم فجأة لقيت
نور هيلاكوبتر ويقول من حسن الحظ كان جنبي تريك أولع فيه إذا صعدت إلى السطح لأنه مافيه نور(( حابك الكذبة)) المهم يقول صرت أوجهه التريك للهيلاكوبتر أولع وأطفي أولع وأطفي فجأة يقول لاحظت نور يسلط
عليّ بالسطح وعلى فراشي يقول دريت أنهم شافوني المهم بديت أأشر بيدي وأشر لهم ينزلون وأمسك ترمس الموية وأصب بالكوب وأحاول وأوضح لهم أني ودي أقهويهم المهم يقول فهموا عليّ وصارت الهيلاكوبتر
تنزل شوي شوي على سطح بيتنا يقول قبل ما تهبط خذيت فراشي ودخلته داخل عشان ما تطيره مروحة الهيلاكوبتر (( ولو تلاحظون الرجال للحين حابكها )) يقول لمّا طفوا الهيلاكوبتر نزلوا وسلموا عليّ وقالوا السموحة يالشيخ
ترانا مضيعين وتونا شارين الهيلاكوبتر وتخبر ما ندل بالجو زين يقول عرفت بنفسي أنا فلان وهم عرفوا بأنفسهم
يقول سواق الهيلاكوبتر ولد الجفالي واللي راكبن معه يقول أحسن أني شايفه أفكر وين ياربي وين يقول وأتذكر في
ART طلع ولد الحاج حسين (( ضيع اسم صالح كامل )) يقول قلت لهم وين تبون تروحون قالوا نبغا الرياض
نتشوف برج المملكة وما حصلناه يقول أنا ضحكت وقلت تروكم بحايل بس بسيطة أدلكم يقول وأأشر على نجم
السير (( نجم السير هذا من راسه )) المهم قلت لهم أتبعوا ذاك النجم لما توازون برج المملكة يقول تقهووا
واستناسوا عندي وطلبوا مني أخاويهم قلت عندي شغل في الإمارة المهم مالكم بالطويلة (( الرجال كان يتكلم
بشكل رسمي وما يضحك وحنّا جالسين ومعطينه جووه وما نضحك من شان كذا صار يواصل في السالفة ))
شغلوا الهيلاكوبتر ومشوا المهم يقول بعدها بكم يوم يقول في نور يجهر عيوني وأنا نايم يقول دريت أنهم بالسما
ويسلمون يقول رفعت يدي وقلت لهم أنزلوا يقول قاموا يولعون النور ويطفونه دريت أنهم مستعجلين يقول تركتهم
وتغطيت على أنهم مهم نازلين يقول فجأة ما دريت إلا صندوق طاح جنب راسي يقول خفت وقمت طلع الخبل أحمد
الجفالي (( صاروا خوياه صار يمون عليهم حتى بالكذب )) رامي عليّ كرتون مليان وكاتب عليه اسمه بغا يطير راسي يقول في الكرتون عطورات من كل صنف ونوع وريحتها بالراس
أنا هنا تدخل وقلت : شلون ما تكسرت العطورات .
قال كانت العطورات بقوارير بلاستك .
المهم هو هنا حس أني كل شوي أبغا أقاطعه مسك الجوال وصار يكلم ويقول محمد خل الوضع زي ماهو الحين جايكم .
انتهت سالفته .

مقتطفات ربّما أطرحها في الموضوع من أرانبه :
لما رجع من القصيم بالريوس .
لما طارت فيه الددسن .
لما حلم بحورية .
لما كان في الجامعة .



أي أحد عنده نموذج لواحد كذاب يطرح سالفته ولا يبخل علينا

تحيتي بابتسامة

[زوبعة فكر]

يقول مرة كان بجدة على البحر
يقول جالس لوحدي ومبسوط وكنت أعزف على العود قبل ما أحرمه <<<<< يدري أنا نبي نحرجه ونجيب له عود ونقول أعزف المهم يقول وأنا أقسّم بالعود لقيت وحدة وراي مزيونة ومربربة شوي عليها وجهه ملائكي يقول فجأة وقفت عن العزف قلت مين أنتِ ياحرمة
قالت واصل بالعزف يافلان يقول أنا طار عقلي شلون عرفت اسمي واصلت لها بالعزف وطلبت مني أطلع لها بأغنية
نقازية وطلعت لها بصحيتي جمرة وذاب الشمع والسكر يقول قامت ترقص وتفتر حولي وتهزها بقوة وتقول واصل
يقول أنا صراحة خفت تطب علينا الهيئة وقفت عزف وأختفت يقول هنا أنا خفت وسميت بالله
ورجعت أعزف <<<<<<<<<<< خوش خوف
المهم يقول وأعزف وطلعت مرة ثانية (( ويسولف وهو متحمس ))
قالت واصل حبيبي بالعزف عشان ما أرجع للمحيط
يقول تصدقون ياعيال طلعت حورية
وكل ما أجي جدة أقابلها هناك بس يقول ما تطلع إلا إذا كنت لحالي




يتبع

[زوبعة فكر]

مرة يقول أبغا أسحب من الصرافة خمس آلاف :)
وهنا لو تلاحظون حابك السالفة لأنه الصرافة لك خلال 24 ساعة بس خمس آلاف المهم يقول وأشوف الرصيد
إلا ستين مليون وفراطة يقول استغربت ورصيدي كان 45670 ريال لو تلاحظون جاب حتى العشرات والرقم أتذكرة
لأنه كان مميّز المهم يقول عالطول اتصلت على الهاتف المصرفي واستفسر قالوا جتك هذي التحويلة من واحد اسمه
جوزيف كروز يقول أنا خفت عالطول قدمت اعتراض وقلت المبلغ هذا مو لي ولا أعرف هذا الشخص يقول رحت للشرطة وبلغت واهتموا بالقضية الشرطة وبعدها بفترة اتصل عليّ العقيد وقال اسمع يافلان هذا صاحب أكبر جماعة
مافيا في كولوميبا ونبي وقفتك معنا لأنه يبي يغسل الأموال بحسابك وأكيد عندهم بيانات كاملة عنك نبي نسحب الأموال ونحطها عندنا وراح يحاول بأي طريقة يوصلك ونبي نمسكه يقول فجأة رن الجوال بعدها بكم يوم والرقم طلع مجهول يقول أنا رديت وقلت مين معاي قال وهو يتكلم بالفصحى جوزيف يافلان سوف أعطيك نصف المبلغ ولكن
حاول أن تخرج خارج المملكة لكي يتسنى لنا التصرف هناك (( أنا مت ضحك لما تكلم بالفصحى والرجال مواصل ماعليه )) يقول أنا قلت له اتصل بعد ربع ساعة وكلمت العقيد وقلت له السالفة كذا وكذا قال لي العقيد واعده بجدة يقول أنا هنا قلت منها أكسب شوفة خويتي يقصد الحورية ومنها أكسب خدمة هذا الوطن (( ولو تلاحظون قرن السالفتين )) يعني الرجال مصمم المهم مسكناه وعطوني الدولة وسام بس ضيعته


يتبع

[زوبعة فكر]

يقول لمّا كنت بالجامعة
الدكتور إذا توهق بشيء أو بسؤال يغمز عينه لي وأفهمها وأطلع وأعلمه الجواب أو الفقرة اللي يبيها
على فكرة كان تخصصه علم نفس
يقول مرة تحداني حدى الدكاترة قبل ما أقدم إنسحابي من الجامعة (( على فكرة هم طردوه )) يقول قال لي يافلان
أبغا أسوي لك اختبار في كل المجالات وإذا جبت الدرجة كاملة راح أقدم استقالتي يقول أنا قبلت التحدي
وعلق إعلان في حائط الجامعة يوضح التحدي اللي بين الطالب والدكتور يقول جاب لي دفتر كامل فيه اسئلة
وكان مدة الاختبار ثلاث ساعات يقول كان الدكتور على راسي وجاوبت على كل الأسئلة وتغير وجهه وصار يترجاني
أخطي بالسؤال الأخير يقول رحمته عشان ما يقدم استقالته وخليت الجواب الأخير فاضي كني نسيته (( حتى ما يبي يجاوب غلط ))



يتبع

[زوبعة فكر]

مرة واحد غيره <<<<<<<<<<<< خلوني أشكل شوي راجع له سوالفه كثيرة

المهم هذا رجال ومحترم مرة وعازمنا باستراحته كان منطقه وأسلوبه حلو وعنده علوم المرجلة وشهم للغاية
وكل سوالفه بالصيد والبر المهم مدري وش لقفه وقام يسولف بإذاعة mbc السالفة هذي لها سنين أيام الفاكسات
يعني اللي يبي يهدي يرسل فاكس حتى اتصال مافيه وتقوم المذيعة تعد الاسماء والاهداءات وهذا الشيء معروف
المهم أبو الشباب قام يهك علينا يقول قبل فترة أتسمع لراديو الإف أم العصر إلا واحد من أهل حايل أتصل عليها
وقام يهدي وبالآخر قال لها أحبك وصارخوا اللي حولوه الشباب وقفلت الخط المذيعة وانحرجت
واحد من خوياه قال له
أصلن مافيه اتصالات بس فاكسات
الرجال ما رقع السالفة لأنه جديد في عالم الأرانب وش سوى طلع من المجلس بالرغم أنه هو راعي الاستراحة وهو اللي عازمنا ومانعرف إلا هو
ذاك الموقف ما أنساه رغم أنه مضى سنين عليه



يتبع

[زوبعة فكر]

يقول مرة راكب الطيارة ومسافر للقاهرة
يقول وحنا بالجو حسيت أنه في شيء مو مضبوط يا أن الطيارة فيها خلل فني وما يبون يقولون لنا
يا الطيار توه متخرج يقول أشوف المطبات الهوائية واجد يقول أنا عورني قلبي وحاولت استفسر من المضيفة
وقلت لها ممكن أقابل الكابتن رفضت وأصريت أنا وهي رافضة المهم يقول أنا على أعصابي جالس بمقعدي وحاس أنه
الوضع مو طبيعي يقول صارت الطيارة تهتز وبقوة والمضيفات جونا يقولوا أربطوا الأحزمة حنا في خطر يقول أنا هنا ما سكتت قمت وركضت لكبينة الطيار حاولت وحدة من المضيفات تمنعني يقول بدون شعور دفيتها ودخلت على الكبتن وقلت خير وش المشكلة شفت الكبتن بلشان يقول فيه خلل إذا ما صلحناه خلال ربع ساعة راح تنفجر الطيارة بالسما قلت وش الخلل قال فيوز التحليق احترق يقول أنا عالطول قلت وريني وين مكان الفيوز ورانيها وأحاول أوصل
أسلاك الفيوز بشكل ما يتعارض مع السالب والموجب وقبل ما أشبك الفيوز رحت أطمن الركاب قلت إن شاء الله المشكلة تنحل رجعت وركبت الفيوز وأشوى تعدلت الطيارة بالجو ويقول ما حلفتوني أنه قام الكبتن وحب راسي وجلسني جنبه يقول يوم نزلنا على الأرض ويتكلم بالميكرفون ويقول حيووا البطل السعودي فلان على إنقاذة يقول نص الراكبين مصريين يقول ويجون يتشكرون مني ويوم نزلت سووا عالطول معي جريدة الإهرامات لقاء صحفي
واعدنا يجيب لنا الجريدة يقول العدد كان 3748784 جاب رقم من راسه



يتبع

[زوبعة فكر]

أتذكر أيام المرحلة الثانوية
كان فيه طالب من شكله تقول محترم وصادق ومايعرف يكذب أبد والمشكلة ممثل وبقوة يعني يعيشك الجو
كان لا يحل واجبات ولا يذاكر ولا يحضر اختبارات ومع ذلك ينجح وش طريقته هذا إذا طلب المعلم أسماء اللي ما حلوا الواجب يقوم هو ويقول بعد أذنك يا استاذ أبغاك برى بكلمة راس يطلع هو وياه ويدخل المعلم وهو يطبطب على راسه ويقول ما عليك ونفس الحكاية تصير بالأختبارات ويعتذر عن الاختبار وينعاد له ويحط له درجات
طلع وش يسوي يتفاول على أهله إذا صار الواجب كثير قال ماتت بنت أخوي ولا عمتي وإذا صار اختبار قال أمي مرقدة بالمستشفى وأنا سهران عندها يعني كذباته وأعذاره ياموت يامستشفى وبالآخر كفشوه المدرسة قال مات خالي أتصل المدير على ابوه وقال صحيح أنه مات خال ولدك لأنه كل أسبوع ميت لكم أحد قال يكذب وأنا جايكم للمدرسة الحين جا ابوه للمدرسة اجتمع بولده عن المدير قال ليش تتفاول وتكذب على خالك وتقول مات يقول ماكذبت خالي سالم مات قال أبوه هذا سالم مات قبل اربع سنين قال ولده طيب أنا تذكرته ونفسيتي تعبت وماقدرت
أركز



يتبع

[زوبعة فكر]

يقول لمّا كان صغير دخل المخزن ويسولف هذي السالفة ويحلف لنا أنه صادق يقول أدور كورتي الصغيرة بين
رفوف المخزن وفجأة ألقى بريق كله غبار يقول أنا مسكته بيدي وحاولت أنفض الغبار يقول ونزلته إلا أكلم نفسي
وأقول ياربي وين كورتي الحمرا فجأة تحرك البريق وانفتح أنا هنا تدخلت وقلت (( أكيد طلع لك مارد المصباح ))
فشلني وقال لا يقول طلع لي من البريق كورة حمرا يقول أنا خفت وهربت بعيد علمت أبوي بالقصة جا للمخزن
ويدور البريق ومالقاه يقول أنا أنجنيت ونسيت السالفة وبعدها فترة وأنا أشوت الكورة على الجدار أفجرت الكورة
وطلع لي البريق يقول جيت أبغا أهرب تعرقلت رجولي وطلع لي واحد من البريق وقال لي أتمنى يافلان ما تكون حروش فأنا كنت بخدمتك لأنك نفضت الغبار فلقد كنت مسجون أكثر من 1000 عام ولكن ياحسافة (( يقول ياحسافة بهالمنطق )) خيبت ظني والآن لا كورة ولا بريق تستاهله ياخسيس ويقول اختفى ومن ذاك اليوم ماقد شفته



يتبع