ادري بتقولون ايش دخل العنوان بالموضوع بعد ماتقرونه بس (هي دي حالتي حاعملكوا ايه)
مقدمة :
البارح قاعد اوصف لواحدن من العيال محل مكينة صراف الراجحي يوم بديت اوصف له ولا كل الوصف مستوصفات اسنان 
( اذا تعديت مستوصف السن الذهبي بيجيك على حجاجك الايمن مستوصف السن المنكسر ثم اذا عقبته بعد الاشاره بتشوف لوحه على شكل سن كبير تسنّه عبسة خضري ومكتوب تحتها عيادة الدكتور هريدي ابو زانه لجراحة فك وتربيط السنون <<< الله العالم انه متخرج من المعهد المهني قسم خراطه وشاف ان سوق السنون اطيب ..)
الزبده اني لاحظت ان كل الوصف راح مستوصفات وعيادات اسنان .. قلت ورى ما اعلم العيارين بتجربتي ومعاناتي مع السنون وغثاها واشوف تعليق ذا العيايره على سالفتي .. ( صورة خشة مراهق مركب جسر كود سنونه ذا المطفشله تواسى قبل العرس )..
وتراها فرصه نصير مع العيلان ونكتب موضوع افتتاحي ونزاله ليوزرنا المبارك << عسى بس ما يبون منا عزيمه ثم نبلش بدايره عزايم وانحن نبي العافيه .. ( إذا لعبوا الرجاجيل بلحاهم ،، العب بلحيتك )<< طرّاه مزاين قحطان.
البداية :
قبل يجي خمس سنين جتنا طفره عزايم وعروس في الصيف لعبت فينا لعب ، أفنت شيابنا وخلتنا عائله بدون جذور ( اللي سدحته جلطه ،، واللي تحرول من النقرس وصار يحبي للسماط " صراع من أجل البقاء" واللي تسددت شرايينه وانزوت خشته وصارت تسنّها عرجة ابو زيد ) << تسنهم يعرفون ابو زيد عااد ..
وطبعن انا من عرض اللي قضت عليهم فتنه المفاطيح والعزايم في هاك الصيف المشؤوم ،، طحت في ذا المفاطيح والحلى والبيبسي الين جاء يومن وقمت منكتم من ريحتي ؟؟
يوم دخلت الحمام وناظرت في المرايه ولا خشتي تبوّخ ريحة خلووووف .. ليته خلوف فم صائم تسان معليش بس انه خلووف سنون محشيتن لحم وتوالي رز وسلطه اللي يشوف خشتي يقول من ذا اللي كابن السماط في ذا الخشه
يوم ناظرت في المرايه ولا لساني أخضر تشوبه زورقه ( صورة مدرس عربي فلسطيني أنجس من بول الحمااااااره )
اللي يشوف لساني يحسبه جنب تيس بلدي عليه ختم مسلخ البلديه غير صالح للاستهلاك الآدمي ،،
طلعت لساحة البيت وقطعت من النخلة خوصه وقمت العب في سنوني يوم قامت سنوني تبطبط تسنّها عبري مستوي ،، أو تسنّها تمر نخله مهضب << مهضب يعني يطيح قبل لا يكتمل نموه ..
بصراحه اول مره في حياتي اشوف منظر زي كذا !!!!!!!! << والله الشوفة التسريهه
صار حباتسي تسنّه شمراخ مافيه الا قموع (صوره عيلان وبنات الرياض وكلّن يحك راسه ويقول وش ذا الحتسي اللي ما قد سمعناه)
سمعت صوت أمي تناديني تقول تعال تقهو ،، التفت وتوني بقول والله يمه مااشتهيت القهوة يوم غابت امي عن الوعي << الله يلوم اللي يلومها جاها بواخ يروع تسنّه دعايه بف بف نفحة الهلاك ،،
أنا يوم شفت أمي طاحت قلت يا روح ما بعدك روح ، كلش إلا سلامة أمي وأهلي و إلا أنا بصري في قريح ،، ( صوت أبو ضاوي يغني : صباح الخير على الورد المفتّح في قناااين مصر # صباح العندليب يحكي بألحان الزهور يا مصر # سلامتك يمه يااا مهره يا حلاّبه يا ركاّبه يا ست الكوول يا ماااماا # سلامة نهدك المرضع # سلامة بطنك الخضراء # سلامتك يمه يااا مااماااااااااا يااا مااماا )
^
^
يا شين قصيد المصاريه أجل بالله عليكم قد شفتوا احدن يوصف امه على انها بقره "حلاّبه" ويخلي بطنها أخضر ؟! ما صارت أم هذي ضفدع أماازوني ( الله أبوهم مصاريه عيال الكلب ) << وش فيه أبو ضاوي قلب عليهم ..
شاورت الشباب و شلون احل مشكلتي وأعالج خشتي قبل لا تداهمنا قوة الطوارئ ثم يكتبون في الجريده ( اكتشاف مصنع لحوم متعفنه في خشة آدمي )
قال واحدن من الشباب وش رايك تروح لمستوصف اسنان في الشفاء ، فيه دكتوره سوريه موووووت لو تقلع حنتسك كله بدون بنج ما دريتا عنه < ما يدري ان خشتي ما عاد فيها سنون وانها صارت تسنّها كورة بدون لستك.
يوم شافني منيب متحمس لسالفة الدكتوره مع ان قلبي أخضر << تصدقون اني منوّل مرابط في مستوصفن جنب بيتنا وأضرب ابره في العضل ثلاث مرات كل عقب عصر عشان اسمع الممرضه وهي تقول بالسلامه كبيده ) << مهيب مغربيه ابد ذا الممرضه جعلي ما ابتسيها
ولأن الصديق وقت الضيق ، التفت على صديق اثق فيه ويعرف ظروفي وقلت له تكفى يابو فلان انخااك والا انخاا الذيب ؟
قال انخ اللي تبي انا معزوم في عرس الليله ومنيب فاضي لك << الله ابوه ولد الخس هيّن يجيبك الله على الراتب يا قليل الفوود
وبعد مداولات وتبادل اقتراحات مع أهل الخبرات ، شارو علي بعضهم اني أروح لـسوريا و أعالج هناك واركب سنون جديدة ما بعد مشت ولا كيلو ، وتصير رحلة حج وقضاء حاجه < طرّاه الدبكه والزهورات والصبايا وسعة الصدر .
ما كذبت خبر وطمرت لموقف الباصات وقصيت تذكرة ( الرياض – القريات – دمشق – سوريا ) << هذا والله المقصه ..
رجعت للبيت وحاتسيت أمي من وراء الجدار وقلت لها ولمي شنطتي يمه ، بروح أزين سنوني قالت أمي : وش أولم وش أخلي .. كل عفشك خلاقين فنيله وصروال مقوصر من كثر الغسل صاير تسنّه قشره بصله لا يستر ولا يسلم من النجاسة << اثرهم صاتزين يوم يقولون ان العقل نعمه وان السنون لها دحل في المخ وان الحتسي ما يزين الين ينبت سن العقل.
ودعت امي من بعيد وحبيت راس الشغاله نيابة عن امي اللي كانت لابستن قناع من مخلفات حرب الخليج لا بارك الله فيمن صنعها << ريحتها ريحة سم فيران من سوء التخزين .
يوم شافتني امي احب راس الشغاله ودموعي تقوطر رحمتني وعطفت علي وقام صدرها يخرخر حليب << ياصبر ذا الشغاله علينا كل شوي طابعين البلاط وحايقين البيت
تجبرت بالله امي ثم جت تركض وضمتني وهي كاتمه نفسها ولفزت في يدي ورقه ورجعت لمكانها ، يوم قريت الورقه لقيتها كاتبه :
( ولدي العزيز : لقد حطيت لك في الشنطة " صرار حلتيت مع شوي مّره لا تستشّم خشتك ثم باتسر ما عاد نعرف انت تمضمض والا توضاء. << بعض الابوان يحرجون عيلانهم بحتسين متخرم وخنبقه مالها سنع
وترى في الشنطه باغه حليب طازه من صدري عشان ما تنساني وعشانك ما تقوى تاكل وعيشتك على الله ثم على السوائل ، وان تسانك وانا امك بتقوى تاكل تراي سالقتن لك مكرونه في ذا الحافظه ، وتراي سالقتها عدله ما كسرتها عشان تمصها من فوق وتطلع من تحت تقااود تسنها حبل مكره. )
في داخل الباص :
ركبت الباص وعرفت ليه كان مكتب الحجز كاتب على تذكرتي " احتياجات خاصه " اثرهم يقصدون ان ريحتي تحوم التسبد ولازم اقعد في الكرسي اللي فوقه مروحة شفط خاصه تصدقون من قوة ذا المروحه خطر تشفط صدري وتقلب تسنه واحدن يغسل كرشة <<< لو يقعد في ذا الكرسي بنت شرط ان يصير صدرها تسنّه اذان عنز يومي بها الهواء من قو الشفط .
الباص كان مليان عوائل سوريه وكلّن معه أكله وشربه ، ومستانسين وانا ياامال فرقا العين ماغير ارضع من ذا الباغه حليب فاطر كله ملح مرتن بنكهة الهيل ومرتن يجي معه طعومه مسواك ؟ << الله العالم ان ابوي يشرب من بزبوز ذا البراّده والا وش جاب نكهة المسواك في حليب امي.
^
^
يااصبر اللي هذا ولدهم ،، شكلهم قافطهم من يوم بدأ يحبي
وابلع من ذا المكرونه الماصله اللي تسنّها أسلاك تلفون << ياصبر بعض الشباب اللي يرضعون في التلفون.
وصلنا سوريا وانا ما غير "اون" وراسي يرج من الوجع وحالتي حاله، وبدون تفكير رحت لعنوان عيادة اسنان كنت ماخذه من واحد من العيال ودخلت عليهم وانا انتفض من التعب والوجع وقلت يا دكتور تكفى واللي يرحم والديك شف لي حل تراي خلاص ما عاد أقوى اتحمّل (صورة ابو ضاوي خانقته العبره ووده يطيح على صدر الدكتور بس مستحي).
رحمني الدكتور وقال : طمّن قلبك يا ابو ضاوي ، ان شاء الله كلها ثلاث ايام وترجع متل اول واحسن كمان.
هلاّ روح ارتاح في الشقه المقابله للعياده ، وانت في ضيافتي ولا تشيل هم.
بغيت اخمه واصيح من زين حتسيه وذرابته.
رحت للشقه وغيرت خلاقيني وانسدحت على السرير يوم بديت اسمع بطني يصااوي من الجوع.
طمرت لعيادة الدكتور وقلت يا دكتور انا جايع ومثل ما انت شايف انا ما اقدر اكل . ما عندكم اكل ينشرب ؟
قال الدكتور : حظك من السماء يا ابو ضاوي
قالها وهو يناظر في ممرضه عنده تسنّها بقره هولنديه من كبر صدرها.
صاح الدكتور على الممرضه : هناء هناء ازاا ممكن بدنا شويه حليب لابو ضاوي
قالت هناء : تكرم عينك وعين ابو ضاوي
وهي تروح لغرفة الضماد شوي ونسمع شخف الحليب في الطاسه وترجع لنا ومعها حليب طايرتن رغااته تسنّه سكر من حلاوته وفيه طعومه زعتر وزيت زيتون << سبحان الله ترى الحريم مثل النياق كلش يطعم في حليبهن
ما حديتوني على الحلف اني يوم شربته ذكرت امي وحليبها الا كله طعومة رز وقرصان وراس خروف محسحس ومصارين وكرشه.
شربت الين رويت وشكرت الدكتور على اهتمامه وفزعته لي ، وشكرت الممرضه على طاسة ذا الحليب وعلمتها ان في نكهة حلوة ، قالت : ولو ابو ضاوي تكرم عينك.
قلت اجل بارك الله فيتس يا هناء ياليت باتسر تاكلين رز عليه كشنه زبيب وصنوبر مع لحم نعيمي نصف استواء تراي مشتهي حليب بنكهة الكبسه السعوديه << صار آندومي مهوب حليب .
ضحكت هناء وقالت : اقرب بس خل اتغرّك عشان تعرف ترقد << يااجود ذا الهناء ، والله اللي مهيب حريمنا ذا التاليات اللي مخلين كلش على الشغاله.
حطيت راسي على كتفها وقعدت تطق على ظهري بحنيّه زايده ( يحلفون اني ما اونست يدها من زود الحنيّه ) مهوب مثل بعض الأمهات اذا صارت مستعجله على طلعة للسوق قامت تدحج في ظهر ولدها الين تنقزخرزتن من خرز ظهره وتطلع مع خشته تسنّها طلقه خرّازه << لو قباله آدمي تسان مات من قوتها.
تغرت وارتحت وحسيت اني مستعد ارقد اسبوع عقب ذا الحليب والتغره ، يوم دخلت شقتي برقد واحس اني محتاج للحمام << منيب عاد محوّم تسبودكم بسواليف الحمام لكن الوكاد اني صرت تسنّي بزر بمهاده ماغير ذرق اصفر يروع .
اصبحنا من باتسر وافطرت على حليب ذا البكره هناء وسلمت نفسي للدكتور يعيزل فيني ويبيزل << والله لو تقولون ثم تقولون ما علي منكم الزم ما علي صحتي (واحدن خابر وش بيطري على بالكم يوم قلت سلمت نفسي للدكتور)
الحقيقه الدكتور كان جيد واشتغل شغل صح ما اسمع الا دريل يحفر ودينمو يشفط وقرقعه.
يوم جاء مع اذاان الظهر ولا الصفه التحتيه من سنوني تامه << اسرع من شغل شركة بن لادن في توسعة الحرم. ومن باتسر مثل ، الين تمت سنوني الفوقيه ,
يوم جاء ثالث يوم ولا الدكتور جايبن الفواتير ويقول لي : خلاص يا بو ضاوي تقدر ترجع لبلدك وتبتسم ابتسامه تسحر الصبايا .
قلت يا دكتور ما ابي ابتسم واسحر ابي بس اكل في جلدي << تحس انها طالعه من قلب.
حاسبت الدكتور وشكرته وحاسبت الممرضه هناء << منيب مخليها والله الحق حق ، والله لو انها ناقه عندي تسان ما يسدها ولا عشرة أكياس مكعبات الوافي وعشرين لبنة برسيم وسبع لبنات تبن في وجه العدو.
وقبل لا اطلع من العياده قالت لي هناء : ابو ضاوي ما بدّك تشوف اخوك من الرضاع ؟ << شكلها تبي تنشبني بمصاريف دراستهم . << من هون الذيب يقرّد
قلت لها : ان شاء الله بشوفهم السنة الجايه وبجيب لهم هدايا بعد << هما الحتسي بلاش.
يوم طلعت من العياده وحولت للشارع ويطل علي الدكتور مع البلكونه ويقول : ابو ضاوي نسيت لا اقول لك ، ترى اسنانك هذي نباتيه وما تتحمل اكل لحوم حمراء او تعريش عظام << يعني ما كنّك يا ابو زيد غزيت.
قلت : يا دكتور العوض ولا القطيعه ، هماي بس بقوى اكل رز وخيار وخبز وطحينيه ، بركه يسد << القناعه كنز لا يفنى.
والله وأحجز على الخطوط السعوديه < < تراهم في الروحه عيو علي اركب في طيارتهم عشان ما عندهم مروحة شفط .
يوم وصلت للرياض ويستقبلوني أهلي هم والشغاله في المطار << جايبين الشغاله معهم عشان تصير الطقه في راسها ، ان حبيتها ولا أغمى عليها جو يسلمون علي وان أغمى عليها ركبوني في حوض الونيت كود الهواء ينفض خياس خشتي.
لكن الحمد لله ، الله عافاني وصارت خشتي تسنّها دعاية معجون اسنان يطلع منها براد مكيف سبليت بنسيم الخزامى << الله يستر على الشغاله لا تخور اذا شمّت ريحة الخزامى ثم تفشلنا في المطار.
وصلنا للبيت يوم قلت لامي احضنيني يمه ، تراي مشتاق لحضنك ، قالت مااش يا وليدي تسنّي مستنكرتك ولا ابيك << والله مشكله ظنّكم اني امي نفرتني ولا رامتني عقب حليب ذا السوريه؟
^
^
على طاري ذا السوالف ، ودّك ان وزاره لصحه تفتح قسم في مستشفيات الولاده خاص "بالتضيير" للبنات اللي يعيون يرضعون أطفالهم. << الضيار عمليه خاصه يقوم بها البدو لارغام الناقه على قبول ولد مهوب ولدها مثل ما نقول الحين ابو ضاوي يوم يرضع هناء.
قلت لامي تعوذي من بليس وحضنتها الين بتست وبتسيت من شوقنا لبعض < لا يهمكم صجتي ومهايطي تراي عند حب الأم اصير أضعف من فرخ العصفور اللي يدبيه النمل .
عزموني اهلي بمناسبة عودتي بالسلامه .. وشرطت عليهم ما يحطون لي لحم عشان سنوني ما تخرب .. قامو حطو لي معلف فيه من ذا الورقيات << تسني قالطن على مبسط جيزاني يبيع خس وبقدونس وكزبره وفجل وبصل أخضر.
يوم بغيت اغسل يديني قال ابوي وشوله تغسل يديك اسمك بتاكل من ذا المعلف غط خشتك وكل << تحسون ان ابوي ما يحب النعومه ، مع انه تخصص أدب انقليزي ويقول وااو واذا جاز له شي يقول مررره كيوت .
حسيت بالإهانه .. وكرهت نفسي وقلت علي وعلى أعدائي .. وأنا أزرق المفطح واقطع ذيك اللحمه اللي تجي تحت المفطح اللي تمغط تسنّها كيابل الاتصالات .. واجرعها جرع ، لا تمر على السنون ثم ابلش ، يوم غصيت وصرت تسنّي دجاجه بلشتن بسرو ..!
يوم بديت اكالخ ودرى ابوي اني غاااص .. وهو يدحجني ذيك الدحجه اللي نقزّت طقم سنوني كله ولاه في وسط الباديه تسنّه حبوب بلياردو << الا هي اسمها حبوب بلياردو ، والا كور بلياردو ( اختلف العلماء في ذلك ولكن الراجح انها مصاقيل علوج )
الوكاد ان اللي شافو منظر سنوني وهي تنقز من محلها تذكرو غطاء عصير الشيوخ اذا نقز من حر ما يونس ..
بغيت اصيح وأندب حظي ، ثم هونت وقلت شي أهون من شي ، الله لا يغير علينا ينفع نعيش بدون سنون وبدون حليب هناء << فاضخن قلبي حليب هناء جعلها توخذ .
ولأن ايماني قوي .. عرفت ان هذا ابتلاء من الله ورضيت بواقعي وقربّت باديه الجريش وغضاره الماء وقمت اتجرع لقم الجريش واحمد ربي اني منيب حرمه واسوق موتر << لا يكثر بس
زبده الهرج:
الحليب غذاء من لا غذاء له
حليب البكره .. غير حليب الفاطر
اللي له سنون يحافظ عليها ترى طعم المكرونه في غير رمضان مهوب زين ابد.
يقول واحدن من الجماعه اذا تبي تسلاك تعافى خلها رابصتن في الماء << هذا اللي يبي يكتب فايده بالقوة
تركيب جسور الاسنان من تالي صار موضه
طلاب المعهد الصحي اللي يفطرون في مطعم ماما نوره يلبسون جسور في خششهم وديودهم كبار ،، تهقون ان الجسور لها علاقه بكبر الديود لدى الرجال ؟ وخاصة طلاب المعهد المذكور اعلاه
شرب الحمير مغااير والا انا وش لي وش الكتابه في العيارين
فمان الله يالله كلن يروح لاهله ويرقد
وعسى ما جاني تكفير
طفشان وجالس لحالي
العرض العادي
