اسعد الله كل اوقاتكم بالمسرّات
مساءكم / جنّة
العاطفي / الله يوفقه ويسعده
جاب براسي هالفكرة ..
قصة اول قصيدة تم نشرها
والمقصود بالنشر ( اظهارها لمحبي الشعر وقرّائه ومتذوقيه)
سواءا في الاعلام / الجرايد / المجلات
او الشبكة العنكبوتيه .. في المنتديات .
حبيت اذكر لكم قصة اول قصيدة تم نشرها لي ..
وابي اعطيكم هالقصة حصلت لي قبل اكثر من عشر سنين
مع الشاعر والاستاذ الرائع / عبدالرحمن العطاوي
كان يومها محرر صفحة مدارات شعبية في جريدة الجزيرة
مااطولها عليكم
كنت ادور احد استشيره في القصايد اللي اكتبها وذيك الايام
ماكانت العلاقات الاجتماعية مع الشعراء كثيرة .
وكنت متخوف من اني انصدم!! ( احد يقول لي ماهي زينة والا شئ .!)
وكنت اتابع صفحة مدارات شعبية باستمرار
واقرا للاستاذ عبدالرحمن العطاوي واشوف القصايد اللي يختارها للصفحة
بعد فترة من المتابعة قلت في نفسي خلني اروح للرجال هذا واستشيره .
بعد ماترددت كثير توكلت على الله ورحت له .
قابلت الاستاذ / عبدالرحمن العطاوي
وكان والله طلق حجاج ونعم الرجل شروا الطيبين شرواكم
سلمت عليه وطلبت من وقته شوي . وسمح لي
وقلت له : انا والله شخصيا مااعرفك
لكني اعرفك من كتاباتك في صفحة مدارات ومن اختيارك للقصائد اللي حنا نقراها .
وحبيت استشيرك في هالقصيدة ان كانت زينه والا احتفظ باللي اكتبه لنفسي!!
قال لي الله يجزاه خير : سمعني القصيدة
وسمعته هالقصيدة وعنوانها :
.
.
حب الشرف
البـارحـة . والنـاس للـنـوم جـارفـــه
____ وآنـا عـيـوني بـازرق الـدمـع ذارفـه
أكـايـد الـعـبـرات والـــهـم والـحـزن
____ وآانــا بـحيٍ نـاقـصـيــنـــه عوارفـه
واشـيـل هـــمٍ آخــر الـلـيـل يبتــدي
____ واللي بقلبـي خــالـق الكـون عــارفـه
علــى ولـيــفٍ حـــال بـيـنـي وبـيــنـــه
____ وقتٍ شـــديــــدٍ بـيّــن الـيـوم طـارفـه
عـيـنـي علـيــها مـن غـلاهـا تشـوقـنـي
____ مثـل السـواني لازرق الجـم غــارفـه
احبــــّهـا ... والـلـّـه رقـيــبٍ عـلـيــنــا
___ حب الشرف من جملة الناس صارفــه
لـــها مـنــزلٍ بـالقـلب بيــّن وواضــح
___ هـي تـعـتـلي بـالقلـب أعلى مـشارفـه
.
.
يعد ماسمعها طلب مني النسخة اللي انا جايبها معي ووعدني بنشرها
وقال لي : ياحي القاف وراعيّه .
راح تشوفها عن قريب في صفحة مدارات شعبية ..
وفعلا . مامضى عليها وقت طويل الا وهي منشورة
فكانت هي اول قصيدة تنشر لي
ووالله مااضاف عليها حرفا . نشرت كماهي
.
.
ولا زلت الى هذه اللحظه
احترم الاستاذ : عبدالرحمن العطاوي
والله يجزاه خير وين ماراح اللي شجعني وخلاني استمر بالكتابة
والاستاذ / عبدالرحمن العطاوي
شاعر لم يبخل علي برأيه .
.
.
اخوتي واحبتي
خذوا من هذه القصة فوائدها ان مرّت على اعينكم ..
تقبلوا مني كل الشكر