بســــم الله الرحمن الرحيم
مديرتي الفاضله...معلماتي العزيزات..اخواتي الطالبات..
السلام عليكم ورحمة الله وبركاته
في هذا الصباح المشرق..وهذا النسيم اللي يشخف القلب نبدء اذاعتنا لهذا اليوم <---اقول تسنتس طولتيه وهي قصيره
بس صدز يازين الاذاعه منول..وحنا بالأبتدائي...وشي اللي تبي تطلع مقدمه والا قرءان تحس كلن يناظره...وحركتات
الللله يالدنيا..المهم مهب ذا موضوعنا
انا ياطويلين العمر والألسن والسلامه*4 رحت لشي اليوم..
وقلت ورا مااسولف لكم..واهذر شوي ..واوسع صدوركم
انا وحدتن..ما اوطن شي اسمه دختور اسنان..تسذا..خلقه..لأنه مره يوم كنت صغيره..رحت لدختور الله لايعيده خلع لي ضرس
بدون بنج تخيلو:( يامل الجدري اللي يفضخ..عيون البعير
تنكدت..وجان نزيف بضرسي ورحت للمستشفى..وحاله مايعلم به الا ربي
وعقبه...قلت تووووووبه ان عمري طبيت عليهم راعين تقليع السنون
كيفه انشاءالله..يغدن سنوني تقل زيتون من السوس..بالطقاق اهم شي الاخلاق وحب الوطن..والمعاشره الحسنه*8 الراحه النفسيه فوق كل شي....بس يوم صار الاسبوع اللي راح...بدا واحد من ضروسي...يستغيث..ويزاعق..لجن وصجن..
كنت بامتحانات ومالي حيله..قلت اهجد يابعدي لين نخلص من غثا المدارس
المهم وامي كل ماتشوفن اتوجع منه...تحلف علي..والله ان تروحين للدكتور..مهبوله انتي؟:@ وهلم جرجر..من هالحتسي
وانا راسي حصاة...وش اللي اروح..ماعندي نيه
المهم جت امي حفظها الله ورعاها..وحجزت لي موعد عند حق الاسنان بدون ما ادريوخلت الموعد بعد يوم من قضيتي من الامتحانات<--موقته يااعردزي
المهم متى علمتن بنفس اليوم اللي قضيت ممتحنه..قالت شوفي يابنيتي ياورده..تراي حجزت لتس عند حق الاسنان باتسر الساعه 6 ونص المغرب
*g <---انا
قلت تخيلي؟وانا اضحك
قالت والله اني صادزه عيب عليتس مرتن كبر قريح وتخافين من الدختور
قلت لاااااااااااااااااع مهناش منب طاسه..اقطعو راسي ولا اروح<--يادافع البلا
المهم....ماش حسيت ان الدعوا مب بكيفي.وان اميمتي تبي تجرن مع شوشتي.وتاخذن مع زمعي..وتطس لم الدكتور
قلت يمه....قالت وات<----تعرف تحتسي انقليزي خطيره امي
:D قلت هو رجل والا مره..قالت لا رجل.دكتور سوري
سوري بعد....رحـــــــــــــــــــــــت وطي*e المهم مشت الساعات بسرعه البس اذا طمرت بوجهه وهج عنك
وجا اليوم الموعود...وجت الساعه 6 ونص..ولبست عبيتي..اجر اذيال الهزيمه
ودخلنا لم العياده..وكان قبلنا وحده عند الدكتور..وانا بعده
قعدنا بالانتظار...ومن بعيد اسمع صوت وززززززززززززز<---ياقبحه ما احبه حق الاسنان
قلت يمه اغديتس تهونين بس وتذكرين ربتس
قالت اها بس اركدي جا دورنا لايكثر قرقتس
استسلمت للامر الواقع..طلعت المره اللي عنده وجا دوري...طلعت الممرضه..قالت
ورده ..ورده
انا>*g نطيت تقل مقروصه انا وامي ودخلنا عليه...
قالت لي الممرضه..اجليس هينا<--تبين انسدح على الكرسي
انسدحت..وانا عبرتي تروح وتجي...
جاء الدكتور..قال(اهلين وسهلين عمو..كيفيك؟منيحه؟)
قلت ايه<--يالله هرجت من الوحشه
وماغير اناظر ايدينه اخاف يزين بي بلا
قال شبكي خايفه؟
قلت لا <---تحداتس...بغى يطيح قلبي بمعدتي بس ستر الله
المهم قال فجي كشرتس..وفجيته له وبنجن بابرتن توحش كبر جدي...وارتخن براطمي..تقل صحيحه صرت عجزت اقل برطمي..عجزت الم اثمي
وبدا يدهر..بهالحفريات وززززززززززز وطنننننننننننننننن وقالي قبل يبدا اذا حسيتي بألم اظغطي على ايدي اقاله يحتك
<--بس انا سنعه افهمه وهي محلقه في السماء
المهم هو من شنق يحفر ويسمكر والممرضه..معه شفاط تشفط السعابيل*4
وكلهن يويدزون بوجهي شوي ويدخلون بخشتي وانا>>>*1 همن جاب ابرتن كبر قريح...
وطع...ويدخله بحلدزي...وبخاخات وحاله<---يهونن عند اللي يقول وززز
مااحبه اللي يقول وززززززززززز نجس احس انه
المهم ويقرب والله خرابيط الكهرب اللي معهن وزززززززززز وطنننننننننننن وععععععن <--حشى دبابات
وانا منتهيه.....من الروعه
المهم..بدا ياما دخل قطن..ياما ابره..ياما نخجر ضرسي بحديده
اخر شي قال انتهينا
قلت وه هو صدز؟
وقمت...تقل..ملحوقه...ماورا اعوذ بالله..بس قال بقى لتس 3 جلسات حسبي الله على العدو
وش اسوي دامي بديت ابكمل
تحياتي......وردة غلا
العرض العادي
